پێنج ساڵە ئاوارەکانی دەرەوەی کەمپ نەوتیان وەرنەگرتووە

میدیازان – عەمار عەزیز – دهۆک بە پاساوی ئەوەی نەوتەکە بەشی هەمووان ناکات، پێنج ساڵە، نەوت بەسەر ئاوارەکانی دەرەوەی کەمپ لە سنوری پارێزگای دهۆک دابەش نەکراوە. بەسێ متۆ، خەڵکی گرد عوزێرە زیاتر لە هەشت ساڵە لە کۆمەڵگای شاریای سەر بە قەزای سێمێل دادەنیشی، بە میدیازانی وت، لە ساڵی ٢٠١٤ـەوە تائێستا تەنیا دووجار نەوتی وەرگرتووە، زیاتر لە پێنج ساڵە ئەو بەشە نەوتەی کە پێویستە بدرێت بە ئاوارەکان بە ئێمە نەدراوە. زیاتر وتی “هەموو ساڵێک لەسەر حسابی خۆمان نەوت دەکڕین، ئەمەش بارگرانی خستووەتە سەر گوزەرانمان”. دیان جەعفەر، بەڕێوەبەری فەرمانگەی کۆچ و کۆچبەران و وڵامدانەوەی قەیرانەکان لە دهۆک بۆ میدیازان ئەوەی پشتڕاستکردەوە کە لە ٢٠١٧ـەوە یەک ئاوارەی دەرەوەی کەمپ نەوتی وەرنەگرتووە. “وەزارەتی کۆچ و کۆچبەران، تائێستا ئەوان بە ئاوارە حیساب ناکات بۆیە نەوتیان پێ نادات” دیان جەعفەر وای وت، ئەوەشی خستەڕوو،  

“پێنج ساڵە ئاوارەکانی دەرەوەی کەمپەکان نەوتیان وەرنەگرتووە”

پێش مانگێگ دوو نوسراویان ئاراستەی وەزارەتی کۆچ وکۆچبەران کردووە کە یەکێکیان دابینکردنی نەوت بوو بۆ ئاوارەکانی دەرەوەی کەمپ، بەڵام تەنیا رەزامەندی بۆ دابینکردنی نەوت بۆ ئاوارەکانی ناو کەمپ هاتەوە. زیاتر وتی “هەموو هەوڵێک دەدەین نەوتیان بۆ دابین بکەین، بۆ ئەمەش سەردانی بەغدا دەکەینەوەو دەمانەوێت بەدەستی بەتاڵ نەگەڕێینەوە”. کۆیی گشتی ئاوارەکانی ئاوارەکانی شنگال ونەینەوا ٦٥ هەزارو ١٨٨ خێزانن، لەم ژمارەیە ٣٨ هەزارو ٢٢٥ خێزانیان لە دەرەوەی کەمپەکان دەژین و ٢٦ هەزار هەزار و ٩٦٣ خێزانی تریش لە ١٥ کەمپی سنورەکە دەژین.