فاروقی مەلا مستەفا ناوی چووە ناو گەورەترین گۆڤاری جیهانییەوە

فەرمان سادق

گۆڤاری ‘Forbes’ ـی نێودەوڵەتی فاروقی مەلا مستەفا وەکو یەکێك لە 100 کەسایەتی سەرکردەی بواری چاودێری تەندروستی لە رۆژهەڵاتی ناوەڕاست دەستنیشاندەکات بۆ ساڵی 2023.

فۆربیس، کۆمپانیایەکی بواری چاپ و بڵاوکردنەوەی ئەمەریکییە، خاوەنی بەناوبانگترین گۆڤارە بە هەمان ناوەوە، مانگانە لەسەر ئاستی جیهان ریزبەندی کەسایەتییەکان دیاری دەکات لە بوارەکانی کاریگەرترین و بەناوبانگترین و دەوڵەمەندترین و چەندین بواری تر.

لە راگەیەندراوێکدا کە گروپی کۆمپانیاکانی فاروق مەلا مستەفا بڵاوی کردۆتەوە، فاروقی مەلا مستەفا، دەڵێت: ئەم دانپێدانانە هەر شایەتییەک نییە لەسەر کاری جددییمان، بەڵکو هانی زیاترمان دەدات تا بەردەوامبین لە باشترکردن و پێشکەشکردنی خزمەتگوزاریی تەندروستی بە کوالیتییەکی بەرز بە نەخۆشەکانمان”.

فاروقی مەلا مستەفا، یەکێکە لە بەناوبانگترین سەرمایەدارەکانی عێراق و هەرێمی کوردستان، خۆی و تیمەکەی شانازی بەوەوە دەکەن کە هەموو سەرمایەکەی لە عێراق و بەتایبەتی لە شاری سلێمانی خستووەتە گەڕ، خاوەنی ئاسیاسێل و شاری پزیشکی فاروق و چەند بزنسێکی گەورەی ترە کە لە ژێر ناوی فاروق گروپ کۆبوونەتەوە.

شاری پزیشکی فاروق، گەورەترین نەخۆشخانەی کەرتی تایبەتە لەشاری سلێمانی لەسەر رووبەری 70,000 مەتر چوارگۆشە بیناکراوە، 210 قەرەوێڵە و زیاتر لە 190 پزیشک لەخۆدەگرێت.