لە هەولێر بە رێنماییەک ئاڵای سەر فەرمانگە و دەزگا فەرمییەکان نوێدەکرێتەوە

فەرهاد حەسەن

سەرۆکایەتی شارەوانی هەولێر لە کۆبوونەوەیەکی فراوانی ئەمڕۆیدا چەندین بڕیاری لەبارەی رێکخستنەوەی شار دەرکرد، یەکێک لەوانە نووسینی سەر دیوارەکانی بەشیوەی نایاسایی لەلایەن ناوەندەکانی خوێندنی ئەهلی قەدەغەکرد و لە رێگەی رێنمایێکیشەوە تەواوی فەرمانگە و دەزگا فەرمییەکان ئاگادار دەکاتەوە کە ئاڵای کوردستان ئەگەر کۆن بووە و رەنگیان رۆیشتووە، نوێیبکەنەوە.

کۆبوونەوەکە ئەمڕۆ شەممە13.6.2026 بەڕێوەچوو، کە بەڕێوەبەری هەر نۆ بەڕێوەبەرایەتییەکانی شارەوانی و بەرپرسانی خزمەتگوزاریی سنووری سەرۆکایەتیی شارەوانیی هەولێر ئامادەی بوون.

ئەو بڕیار و رێنماییانەی لە کۆبوونەوەکە دەرکران بریتی بوون لە:

–        بەردەوامی گرتنەبەری رێکارەکانی هەڵمەتی لادانی زێدەڕۆیی و رێکخستنەوەی شۆستە و شەقامەکان.

–        رێگری کردن لە دروستکردنی کەپر و باخچەی نایاسایی لە گەڕەک و کۆڵانەکاندا.

–        رێکخستنەوەی دەروازەکانی هاتنە ناوەوەی شاری هەولێر.

–        گرنگیدان بە پاکوخاوێنی سەنتەری شار و کۆڵانەکان و بەردەوامی هەڵمەتی لەناوبردنی گژوگیای وشک بۆ رێگری لە ئاگرکەوتنەوە و هەروەها داڕشتنی پلانی نوێ بۆ زیادکردنی رێژەی سەوزایی بە تایبەت لە ناو گەڕەکاندا.

–        سڕینەوەی نووسینی سەر دیوارەکان و گرتنە بەری رێکاری یاسایی بۆ ئەو دەزگاو پەیمانگا و قوتابخانە ئەهلییانەی بە شێوازی نایاسایی ریکلام و تابلۆ لە شەقام و شوێنە گشتییەکان هەڵدەواسن.

–        بەدواداچوون بۆ ئەو شۆفێر و بارهەڵگرانەی کە خاشاکی بیناسازی و زبڵ لە شوێنە گشتی و قەدەغەکراوەکاندا فڕێدەدەن.

–        بەدواداچوون بۆ باڵاخانە تەواونەکراوەکان و پێدانی مۆڵەتی بینا بەپێی رێنمایی کە رووپۆش و رێکپۆش بێت و نابێت بەرزی و نزمی لەسەر شۆستەدا بکرێت.

لە بەشێکی دیکەی کۆبوونەوەکەدا، رێنمایی درا بە ئاگادارکردنەوەی سەرجەم دامودەزگاو شوێنە فەرمیەکان بۆ گۆڕینی ئاڵای کۆنی کوردستان بە ئاڵای نوێ لە کاتی کۆنبوون یان کاڵبوونەوەی رەنگەکەیاندا.