شارەوانی هەولێر دەست بە جێبەجێکردنی بڕیاری وەزارەتی ناوخۆ کرد بۆ نەهێشتنی زێدەڕۆییەکان

فەرهاد حەسەن

شارەوانی هەولێر دەست بە جێبەجێکردنی بڕیاری وەزارەتی ناوخۆ کرد لەبارەی نەهێشتنی زێدەڕۆییەکان و بۆ ئەم مەبەستەش هەموو بەڕێوەبەرایەتییەکانی راسپارد دەست بەکار بن.

شارەوانی بڵاویکردووەتەوە، پاڵپشت بە بڕیارەکانی وەزارەتی ناوخۆ و راسپاردەکانی وەزیری شارەوانی و گەشتوگوزار و پارێزگاری هەولێر ئەمڕۆ شەممە 16.5.2026، سەرۆکی شارەوانی لەگەڵ گشت بەڕێوەبەری بەڕێوەبەرایەتیەکان و سەرپەشتیار و ژمارەیەک لە سەرۆک بەشەکانی سنوری سەرۆکایەتی شارەوانی هەولێر کۆبووەوە .

هەموو بەڕێوەبەرایەتیەکانی راسپارد بۆ رێکخستنەوە و لادانی زێدەڕۆییەکانی ناو شاری هەولێر و هەروەها بەدواداچوون بۆ بازاڕ و شوێنە گشتیەکان و راگرتن و رێگریکردن لە هەر زێدەڕۆییەک کە کرابێتە سەر موڵکی گشتی و کەمکردنەوەی جەنجاڵی سەر شەقامەکان، بە تایبەت رێگا سەرەکی و دەروازەکانی هاتنە ناوەوەی شار .

لە کۆبوونەوەکە، تیشک خرایە سەر رێکارەکانی رێگەپێدانی دروستکردنی خانوو و باڵەخانەکان و رێکخستنەوەی رووکار و شۆستەکان ئەوەش بەپێی رێنماییە یاساییەکان و گەڕانەوەی سیمای شار و پاراستنی لە رێکپۆشی .