ئاوی خواردنەوەی گەڕەکێکی کفری قوڕاو دەھێنێت

میلاد جەلال – گەرمیان

دانیشتووانی گەڕەکی “ئەوبەر” لە قەزای کفری، بەیانیان لەبری ئاوی پاک، قوڕاو لە بەلوعەکانیان دێتە دەرەوە، بەڕێوەبەری ئاوی شارەکەش دەڵێت، “کێشەکە کاتییە و پەیوەندی بە تازەیی بیرەکانەوە هەیە”.

هەڵمەت عەبدولعەزیز، دانیشتوویەکی گەڕەکەکەیە و ڤیدیۆیەکی بۆ 964 ناردووە کە تێیدا ئاوێکی رەنگ قاوەیی تۆخ دەردەکەوێت. ئەو دەڵێت: “هەموو بەیانییەک کە ئاو دەکرێتەوە، دەبێت کاتژمێرێک بە فیڕۆی بدەین تا ئاوەکە روون دەبێتەوە”.

بەپێى گرتە ڤیدیۆییەکە، قوڕ و لیتە لە بۆرى ئاوەکە دێتە دەرەوە و شیاوى خواردنەوە نییە.

ئەو هاوڵاتییە نیگەرانە لە کوالێتی ئاوەکە و دەڵێت: “ئاو دەبێت بێ ڕەنگ و تام و بۆن بێت، ئەمەی ئێمە هەرکەس بیخواتەوە گورچیلەکانی لەدەست دەدات”.

حەمید رەشید، بەڕێوەبەری فەرمانگەی ئاوی کفری، بوونی کێشەکەی بۆ 964 پشتڕاستکردەوە و وتی: “راستە نزیکەی کاتژمێرێک ئاوەکە قوڕاوە، بەڵام دواتر روون دەبێتەوە و کێشەی نامێنێت”.

بەڕێوەبەری ئاو هۆکاری دروستبوونی ئەو ئاوەى بۆ تازەیى بیرى گەڕەکەکە گەڕاندەوە، جگە لەوە وتیشى،”بەهۆى زۆریی بارانبارینی ئەمساڵ، ئاستی ئاوی ژێرزەوی بەرزبووەتەوە و زیخ و قوڕی بنی بیرەکانی هێناوەتە سەرەوە”.

حەمید ڕەشید ئاماژەی بەوەش کرد، تەنیا ئەو گەڕەکە نییە و ساڵی رابردوو پێنج بیری تازەیان لێداوە، هەر گەڕەکێکیش ئاوی لەسەر ئەو بیرانە بێت، لە سەرەتادا هەمان کێشەی دەبێت و “بەپێی کات خۆی چارەسەر دەبێت”.

پێداچوونەوە: وریا فەتاح