دیمەنی یەکێکە لە گیا بەهارییەکان _ وێنە: 964
کاروباری مین لە هەولێر قسەی هەیە
بۆ گیای بەهارە ژیانی خۆتان مەخەنە ناو مەترسیی مینەوە
964+
ئەحمەد مستەفا
کاروباری مین لە هەولێر داوا لە خەڵک دەکات، بۆ کۆکردنەوەی گیای بەهاری، سەرکێشی بە ژیانی خۆیانەوە نەکەن و نەچنە ناو کێڵگە مینەکان.
گرتە ڤیدیۆییەک لە تۆڕە کۆمەڵایەتییەکان بڵاو بووەتەوە، هاوڵاتییەک لە ناوەڕاستی کێڵگەیەکی میندایە و سەرقاڵی کۆکردنەوەی گیای بەهارییە.
ئەمە وای لە دەزگای مین کردووە هۆشداری بە خەڵک بدات، دوور بکەونەوە لەو کارە و لە راگەیەندراوێکدا کە 964 بینوویەتی دەڵێ، ژیانی مرۆڤ زۆر لەوە بەهادارترە کە بەهۆی چەند جۆرە گیایەکی بەهارییەوە بکرێتە قوربانی.
ئەم رێنماییانەشی خستووەتە پێش چاوی خەڵک؛
دوورکەوتنەوە لە ناوچە گوماناوییەکان: بە هیچ شێوەیەک مەچنە ناوچە شاخاوییە دوورەدەستەکان کە شارەزایی تەواوتان لێیان نییە.
دەستکارینەکردنی تەنی نامۆ: لەکاتی بینینی هەر پارچە ئاسن یان تەنێکی گوماناوی، بە هیچ جۆرێک لێی نزیک مەبنەوە.
پەیوەندیکردن بە هێڵی گەرم: لەکاتی هەر حاڵەتێکی نەخوازراو یان بینینی مین، ڕاستەوخۆ پەیوەندی بکەن بە ژمارە 182.
بەهۆی بارانبارینی زۆری ئەمساڵەوە مەترسییەکان 2 هێندە زیاد بوون، چونکە لافاو و باران دەبنە هۆی گواستنەوەی مینەکان لە شوێنێک بۆ شوێنێکی تر یان دەرکەوتنی ئەو مینانەی کە پێشتر لەژێر خاکدا بوون، لە راگەیەندراوەکەیدا وا دەڵێ.
