تەرزە و بارانی بەخوڕ بەڕێوەیە و ئۆتۆمبێلەکانتان داپۆشن

964+

شۆڕش قادری

تەرزە و باوبۆرانی بەهێز بەڕێوەیە، ئۆتۆمبێلەکانتان داپۆشن و تا بۆتان دەکرێت خۆ لە شوێنی قەرەباڵغ و ناوچە شاخاوییەکان مەدەن.

بەپێی پێشبینییەکانی کەشناسی هەرێم، ئەمڕۆ سێشەممە 28.4.2026 بارانبارین لە زۆربەی ناوچەکانی کوردستان بەم شێوەیەی خوارەوە دەستپێدەکاتەوە.

لە سەنتەری پارێزگای هەولێر ئەگەری بارانبارین هەیە لە کاتەکانی نیوەڕۆ و دوای نیوەڕۆ، لە ناوچە شاخاوییەکانی ئیدارەی سۆران بارانبارینی بەلێزمە دەبێت و لە هەندێ کاتدا هەورە تریشقەی لەگەڵ دەبێت، شەپۆلەکە بەشێک لە دەشتاییەکانیش دەگرێتەوە.

لە ناوچە شاخاوییەکانی پارێزگای دهۆک و ئیدارەی سەربەخۆی زاخۆ بارانبارین کەمتر دەبێت، بارانەکە زیاتر دوای نیوەڕۆ و بەشێوەی نمە بارانی پچڕپچڕ دەبێت.

لە پارێزگاکانی سلێمانی و هەڵەبجە و کەرکوک لە هەندێ کاتدا بارانبارین و هەورە تریشقە دەبێت، ناوچەکانی باشووری پارێزگای سلێمانی دابارینی زیاتر دەبێت، هەندێ کات لێزمەباران دەبێت و لەگەڵ ئەگەری تەرزە بارین.

لە ئێوارەدا ناسەقامگیری کەشوهەوا لە بەشێک لە ئیدارەی گەرمیان زیاد دەبێت، بارانبارین بەشێوەی لێزمەبارانی بەردەوام و هەورە تریشقە دەبێت و زۆربەی ناوچەکانی گەرمیان دەگرێتەوە، خێرایی با بۆ سەروو 25 کم لە کاتژمێرێک زیاد دەبێت لە هەندێک شوێن و کاتدا، ئەگەری تەرزەبارین و بەرزبوونەوەی ئاستی ئاویش لەئارادایە.

بۆ سبەی چوارشەممەش بارانبارین بەردەوام دەبێت، لە هەندێک شوێن بارانی بەخوڕ دەبێت و لە ناوچە شاخاوییەکان زیادتر دەبێت.

بەرزترین پلەکانی گەرمای پێشبینیکراو بەپلەی سیلیزی بۆ ئەمڕۆ:

هەولێر: 23 پلەی سیلیزی

پیرمام: 19 پلەی سیلیزی

سۆران: 22 پلەی سیلیزی

حاجی ئۆمەران: 15 پلەی سیلیزی

سلێمانی: 23 پلەی سیلیزی

چەمچەماڵ: 24 پلەی سیلیزی

دهۆک: 24 پلەی سیلیزی

زاخۆ: 25 پلەی سیلیزی

هەڵەبجە: 22 پلەی سیلیزی

گەرمیان: 24 پلەی سیلیزی

ئەمڕۆ و سبەینێش بارانە؛ هەورە بروسکە و تەرزەشى لەگەڵ دەبێت

باران و بەفر بەڕێوەیە؛ کەشوهەوای 48 کاتژمێری داهاتوو جیاوازە