ویستیان خانوویەک دروست بکەن خانوویەکی دیکەیان لێ رووخا

بڕوا مەجید – شارەزوور

ویستیان خانوویەک دروست بکەن، خانوویەکی دیکەیان لێ رووخا، بەڵام بەهەرەوەزی و هاوکاری یەکتر کێشەکەیان تێپەڕاند.

پێشنیوەڕۆی ئەمڕۆ شەممە 25.4.2026 لەکاتی کارکردن و پاککردنەوەی پارچە زەوییەک لە شارەزوور بۆ دروستکردنی خانوو تیایدا، دیوار و بەشێکی سەقفی خانووی دراوسێکەیان داڕما و پیکابی خاوەن ماڵەکەی داغان کرد.

شاخەوان مەحمود خاوەن زەوییەکە بە 964ـی وت، “لەگەڵ ئامۆزاکەم دراوسێین، ئەمڕۆ ویستمان زەوییەکە پاک بکەینەوە و خانووی تێدا دروست بکەین، لەناکاو بەشێک لە خانووی ئامۆزاکەم کەوت بەسەر ئۆتۆمبێلەکەیدا”.

ئاماژەی بەوەشکرد، رووداوەکە بەخێر گوزەراوە، جگە لە زیانی ماددی زیانی گیانی نەبووە و بەهاوکاری یەکتر قەرەبووی زیانەکان دەکەنەوە.

پێداچوونەوە؛ شۆڕش قادری