شەڕ راوەستا و ئاگربەست راگەیاندرا، لە بەسڕەش كێشەیەكی گەورە روویدا

ئەرسەلان عەبدوڵا

هەرچەندە شەوی رابردوو هەموو ناوچەی رۆژهەڵاتی ناوەڕاست و وڵاتە گەورەكان لەسەر خەت بوون و چاوەڕێی راگەیاندنی ئاگربەستی نێوان ئەمریكا و ئیسرائیل و ئێران بوون، بەڵام ئەگەر هەموو وردەكارییەكان نازانیت، لێرە هەموویان بخوێنەوە.

–  ئەمریكا و ئێران، بە نێوەندگیریی پاكستان رێككەوتن بۆ دوو هەفتە شەڕ رابگرن و ئاگربەستیان راگەیاند.

–   بەپێی رێككەوتنەكە، دەبێت ئێران دەستبەجێ گەرووی هورمز بكاتەوە.

–  رۆژی 10ی ئەم مانگە گفتوگۆیەكانی ئێران و ئەمریكا لە پاكستان دەستپێدەكات بۆ گەیشتن بە ئاشتی و رێككەوتنی هەمیشەیی.

–  وڵاتانی پاكستان، میسر، توركیا و مەغریب رۆڵیان لە رێككەوتنی نێوان ئەمریكا و ئێران هەبوو.

– ئەمریكا و ئێران لەسەر رێككەوتنێكی 10 خاڵی رێككەوتوون.

–  دۆناڵد ترەمپ رایگەیاند: راگرتنی شەڕ مەرجدارە بەوەی ئێران دەستبەجێ گەرووی هورمز بکاتەوە، ئێمە لەم دانوستانەدا بەرژەوەندییەکانی ئەمەریکا و وڵاتانی رۆژهەڵاتی ناوەڕاست وەک یەک دەپارێزین.

–  ترەمپ: راگرتنی شەڕ سەركەوتنێكی گەورەیە بۆ ئەمریكا.

–  ترەمپ: ئێران ئێستا دەتوانێت دەست بە ئاوەدانكردنەوەی وڵاتەكەی بكات.

–   ترەمپ: لەگەڵ دۆسیەی یۆرانیۆمی ئێران مامەڵەیەكی گونجاو دەكەین.

– ئیسرائیل پاڵپشتی لە ئەمریكا دەكات بۆ ئاگربەست، بەڵام هێرشەكانی بۆ سەر لوبنان راناگرێت.

–   ئەنجومەنی ئاسایشی نیشتمانیی ئێران دەڵێت: سەرکەوتین و ئەمەریکا ناچاربوو مەرجەکانمان قبوڵ بکات

–  کەناڵی CNN : ئیسرائیل رازی بوو ئاگربەست رابگەیەنێت و هێرشەکانی سەر ئێران رادەگرێت.

–  دوای راگەیاندنەکەی ترەمپ نرخی نەوت زۆر خێرا هاتە خوارەوە و یەک کاتژمێر بەس بوو بۆ ئەوەی بەرملێک نەوتی برێنت بگاتە 90 دۆلار.

–  سكرتێری نەتەوە یەكگرتووەكان پێشوازی لە راگرتنی شەڕی نێوان ئەمریكا و ئیسرائیل و ئێران دەكات.

–  کەتائیبی حیزبوڵڵای عێراقی بڕیاری ئازادکردنی كچە رۆژنامەنووسی ئەمریکی شیلی کیتلسۆنی دا و داواش کراوە دەستبەجێ عێراق جێبهێڵێت.

–  شەوی رابردوو پێش راگەیاندنی ئاگربەست، بارەگاكانی حەشدی شەعبی لە بەغدا، بە چڕی لە چەند ناوچەیەك بۆردومان كران

–  ژمارەیەك خۆپێشاندەر لە بەسڕە هێرشیان كردەسەر كونسوڵخانەی كوێت لە بەسڕە و ئاڵای وڵاتەكەیان لەسەر بینای كونسوڵخانەكە هێنایە خوارەوە.

– وەزارەتی ناوخۆی عێراق: لە هێرشی خۆپێشاندەران بۆ سەر كونسوڵخانەی كوێت، پێنج كارمەندی ئەمنی و چەند هاوڵاتییەك بریندار بوون و رەوشەكە كۆنتڕۆڵ كراوە.

– كوێت بۆ هێرشكردنەسەر كونسوڵخانەكەی لە بەسڕە: حكومەتی عێراق بەرپرسە و چاوپۆشی لێناكەین.