ئاوەکەی دەربەندیخان 160 مێگاوات کارەبای لێ بەرهەم دەهێنرێ

ئەحمەد مستەفا

دوو یەکە لە وێستگەی کارۆئاوی دەبەندیخان بەگەڕخراوە و  زیاتر لە 160 مێگاوات کارەبای خستووەتە ناو تۆڕی کارەبای نیشتمانیی، ئەمڕۆش بەڕێوەبەر و تیمێک لە کارەبای سلێمانی چوون بۆ لایان.

کارەبای سلێمانی لە راگەیەندراوێکدا دەڵێ، ئەندازیار ئەنوەر حەمەسەعید، بەڕێوەبەری کارەبای سلێمانی و ئامانج محەمەد، قایمقامی دەربەندیخان تیمێکی هاوکاریان، سەردانی هەریەک لە بەڕێوەبەرایەتی دابەشکردنی کارەبای دەربەندیخان و وێستگەی کارۆئاوی دەربەندیخانیان کرد.

گفتوگۆکراوە لەسەر چۆنیەتی بەڕێوەچوونی ئیش و کارەکان و ئامادەکارییەکان بۆ پرۆژەی رووناکی لە سنوری دەربەندیخان، وە سەردانی وێستگەی کارۆئاوی دەبەندیخان کراوە.

کارەبای سلێمانی دەڵێ، دەستخۆشی لە ستافەکە کراوە کە کاری باشیان کردووە و توانرا دوو یەکە بەگەڕبخرێتەوە و زیاتر لە 160 مێگاوات کارەبا بخاتە ناو تۆڕی کارەبای نیشتیمانی و باس لە بەگەڕخستنەوەی یەکەی سێیەم کراوە.

پێشتر، وەزارەتی کارەبای هەرێمی کوردستان راگەیاندراوێکی بڵاوکردوەتەوە و ئاماژە بوونی گرفتی تەکنیکی کرد، وە وتی، بەهۆیەوە پێدانی کارەبا کەمدەکەنەوە “بەهۆی گرفتێکی تەکنیکی، هەناردەی غاز بۆ وێستگەکانی بەرهەمهێنانی کارەبا کەم بووەوە”.

گەرما و سەرما کاریگەری لەسەر خواستی کارەبا هەیە، لە وەرزی زستانی ئەمساڵ، خواستی کارەبا لەسەر بەکارهێنان 7500 مێگاواتی تێپەڕاندبوو، لە کاتێکدا بەرهەمهێنانی کارەبا تەنیا 3500 مێگاوات بوو.