فڕۆکەیەکى هێڵى ئاسمانى عێراقى..وێنە ئاژانسى دەنگوباسى عێراق
درێژکرایەوە
ئاسمانی عێراق بۆ 72 کاتژمێری دیکە بە داخراوی دەمێنێتەوە
964+
وریا فەتاح
دەسەڵاتی فڕۆکەوانیی شارستانیی عێراق، بڕیاریدا داخستنی ئاسمانی وڵات بۆ ماوەی 72 کاتژمێری دیکە درێژبکاتەوە و دەڵێت “ئەمە رێکارێکی کاتی و خۆپارێزییە”.
ئەمڕۆ هەینی 13.3.2026، دەسەڵاتی فڕۆکەوانیی شارستانی لە راگەیەندراوێکدا بڵاویکردەوە، داخستنی ئاسمانی عێراق بەڕووی سەرجەم ئەو فڕۆکانەی دێنە ناوەوەی عێراق، یان دەڕۆن و بەسەر ئاسمانی وڵاتەکەدا تێدەپەڕن بۆ 72 کاتژمێری دیکە درێژکرایەوە.
بەپێی راگەیەندراوەکە، بڕیارەکە لە کاتژمێر 12:00ی نیوەڕۆی ئەمڕۆ هەینییەوە دەستیپێکردووە و تاوەکو کاتژمێر 12:00ی نیوەڕۆی رۆژی دووشەممەی داهاتوو بەردەوام دەبێت.
دەسەڵاتەکە هۆکاری بڕیارەکەی بۆ “هەڵسەنگاندنی بەردەوامی رەوشی ئەمنی و پێشهاتەکانی ناوچەکە” گەڕاندووەتەوە و روونیکردووەتەوە، لە داهاتووشدا بەپێی گۆڕانکارییەکان هەڵسەنگاندنی نوێ بۆ بڕیارەکە دەکرێت.
لە کۆتاییشدا ئاماژە بەوە کراوە، هەر نوێکاری و گۆڕانکارییەک لە رەوشەکەدا هەبێت، کۆمپانیاکانی فڕۆکەوانی و لایەنە پەیوەندیدارەکانی لێ ئاگادار دەکرێتەوە.
