حەوت بەنزینخانە لەسەر گرانکردنی غاز لە سلێمانی سزادران

دیلان محەمەدجەزا – سلێمانی

دوای ئەوەی چەند هاوڵاتییەک گلەییان لە گرانبوونی غاز لە سلێمانی کرد، 964 گلەییەکەی گەیاندن و حەوت بەنزینخانە سزا دران.

عومەر عەبدوڵا سەرۆکی لیژنەی غاز لە قایمقامیەتی سلێمانی بە 964ـی وت، “دوایئەوەی ڤیدیۆی گلەییکردنی چەند هاوڵاتییەک لەسەر گرانبوونی غاز لە پلاتفۆڕمەکانی ئێوەوە بڵاوبووەوە، بەدواداچوونمان کرد و پسوڵەی سەرپێچیمان بۆ حەوت بەنزینخانە کرد”.

“پێرێ لیترێک غاز بە 350 دینار بووە، دوێنێ بە 400 و ئەمڕۆ کردوویانە بە 475 دینار، هیچ پاساوێکیشیان بۆ ئەو کارەیان نەبووە، بۆیە سزامان دان”، عومەر عەبدوڵا وای وت.

ئاماژەی بەوەشکرد، هەموو مانگێک 19 بریکاری غاز لەسەر گرانفرۆشی و سەرپێچی جۆراوجۆر سزا دەدەن.

پێداچوونەوە؛ شۆڕش قادری