لە سلێمانی بە نەشتەرگەری دەرزییەکیان لە قوڕگی کەسێک دەرهێنا

توانا نەقی

لە نەخۆشخانەی شار نەشتەرگەرییەکی هەستیار بۆ هاوڵاتییەکی تەمەن 42 ساڵ ئەنجامدرا و مەترسییەکی گەورەی لەسەر ژیانی لابرا، کە دەرزییەک لە ناو قوڕگی بووە.

بەڕێوەبەرایەتی تەندروستی سلێمانی بڵاویکردەوە، پاش ئەوەی هاوڵاتییەک سەردانی نەخۆشخانەی فریاکەوتنی رانیەی کرد و باسی لەوەکرد کە دوای ئەوەی ژەمێک مریشکی خواردووە هەست دەکات گیربوونێک لە قورگیدا هەیە و كاری تەندروستی پێویستی بۆ کرا و رەوانەی نەخۆشخانەی شار لە سلێمانی کراوە.

ئاماژە بەوەشکراوە، لە نەخۆشخانەی شار دڵنیابوونەوە لە گیربوونی تەنێکی نامۆ لەبەشی خوارەوەی قوڕگی و نزیکبوونەوەی لە فەقەراتی ملی بە پەلە نەشتەرگییان بۆ ئەنجامدا.

لە ئەنجامی نەشتەرگەرییەکە دەرزییەکی 3.5 سم لە قوڕگی نەخۆشەکە دەرهێنراوە و کە بەوتەی نەخۆشەکە دەرزییەکە لەناو ئەو مریشکەبووە کە خواردوویەتی.