مادۆرۆ و هاوسەرەكەی لە لایەن هێزی دێلتاوە دەستگیركراون

964+

ئەرسەلان عەبدوڵا

میدیاکانی ئەمریکا ئەمڕۆ شەممە 3.1.2026 رایانگەیاند نیکۆلاس مادۆرۆ سەرۆکی ڤەنزوێلا و هاوسەرەکەی لەلایەن هێزی دێڵتای ئەمریکاوە دەستگیرکراون.

لە راپۆرتەکاندا هاتووە، “نیکۆلاس مادۆرۆ سەرۆکی ڤەنزوێڵا و هاوسەرەکەی لەلایەن هێزی دێڵتای ئەمریکاوە دەستگیرکراون”.

پێشتر دۆناڵد ترەمپ، سەرۆکی ویلایەتە یەکگرتووەکانی ئەمەریکا “هێرشە سەرکەوتوو و بەرفراوانەکانی” سەر ڤەنزوێلای پشتڕاستکردەوە، ئەمەش ئاماژەیە بۆ ئەوەی مادۆرۆ و هاوسەرەکەی بە دیل گیراون و بە فڕۆکە گواستراونەتەوە دەرەوەی وڵات.

ترامپ لە ترو سۆشیال وتی: ویلایەتە یەکگرتووەکانی ئەمریکا ئۆپەراسیۆنێکی سەربازی بەرفراوانیان بەسەر ڤەنزوێلا و سەرۆکەکەی نیکۆلاس مادۆرۆ ئەنجامدا، کە لەگەڵ هاوسەرەکەیدا بە دیل گیرا و بۆ دەرەوەی ئەو وڵاتە گواسترانەوە.

ئاماژەی بەوەش کرد، “ئەم ئۆپەراسیۆنە بە هاوکاری دەزگاکانی جێبەجێکردنی یاسای ئەمریکا ئەنجامدراوە و دواتر وردەکاری زیاتر بڵاودەکرێتەوە.

هێزی دێلتا چییە؟

هێزی دێلتا (Delta Force)، کە بە فەرمی بە (1st Special Forces Operational Detachment-Delta) دەناسرێت، یەکێکە لە یەکە هەرە بژاردە، نهێنی و مەشقپێکراوەکانی هێزە تایبەتەکانی سوپای ویلایەتە یەکگرتووەکانی ئەمریکا.

1-ئەركە سەرەکییەکان:
ئەم هێزە بۆ راپەڕاندنی مەترسیدارترین و ئاڵۆزترین ئەرکەکان دروستکراوە، لەوانە:

·دژە تیرۆر: رووبەڕووبوونەوەی گروپە تیرۆریستییەکان لە جیهاندا.

·رزگارکردنی بارمتە: ئۆپەراسیۆنی رزگارکردنی ئەو کەسانەی لە بارودۆخی زۆر سەختدا دەستبەسەرکراون.

·ئۆپەراسیۆنی ڕاستەوخۆ: هێرشی کتوپڕ و خێرا بۆ سەر ئامانجە گرنگەکان.

·سیخوڕی و گەڕان: کۆکردنەوەی زانیاری لە پشت هێڵەکانی دوژمنەوە.

2. مێژووی دامەزراندن:
هێزی دێلتا لە ساڵی 1977 لەلایەن عەقید چارڵز بێکویس دامەزرا، بێکویس پێشتر لەگەڵ هێزی (SAS)ی بەریتانی کاریکردبوو و سەرسام بوو بە شێوازی کارکردنیان، بۆیە ویستی هێزێکی هاوشێوە لە ئەمریکا دروست بکات کە تایبەت بێت بە دژە تیرۆر.

3. نهێنی بوون:
حکومەتی ئەمریکا و وەزارەتی بەرگری (پێنتاگۆن) بۆ ماوەیەکی زۆر بوونی ئەم هێزەیان بە فەرمی پشتڕاست نەدەکردەوە، زۆربەی ئۆپەراسیۆنەکانیان بە نهێنی دەمێننەوە و تەنانەت ناوی ئەندامەکانیشیان ئاشکرا ناکرێت.

4. پرۆسەی هەڵبژاردن:
وەرگرتن لە هێزی دێلتا یەکێکە لە سەخترین تاقیکردنەوە سەربازییەکان لە جیهاندا. کاندیدەکان دەبێت ئەزموونی زۆریان لە سوپادا هەبێت و تاقیکردنەوەی دەروونی و جەستەیی زۆر توند تێپەڕێنن کە هەندێک جار چەندین هەفتە دەخایەنێت لە ناوچە شاخاوییەکاندا بەبێ خەو و خواردنی پێویست.

4. پەیوەندی بە یەکەکانی ترەوە:
هێزی دێلتا بەشێکە لە فەرماندەیی ئۆپەراسیۆنە تایبەتە هاوبەشەکان (JSOC). زۆر جار بە “هاوتا”ی هێزی (SEAL Team Six)ی هێزی دەریایی دادەنرێت، بەڵام دێلتا سەر بە هێزی وشکانییە.

نموونەی ئۆپەراسیۆنە ناسراوەکانیان:

·بەشدارییان کرد لە هەوڵی رزگارکردنی بارمتە ئەمریکییەکان لە ئێران (1980) کە بە “ئۆپەراسیۆنی چنگی هەڵۆ” دەناسرێت (بەڵام سەرکەوتوو نەبوو).

·  رۆڵی سەرەکییان هەبوو لە دەستگیرکردنی سەدام حوسێن لە ساڵی 2003.

·  ئۆپەراسیۆنی کوشتنی ئەبووبەکر بەغدادی، خەلیفەی پێشووی داعش لە سووریا (2019).

بە کورتی، هێزی دێلتا “نوخبەی نوخبەکان”ە لە سوپای ئەمریکا و تەنیا بۆ ئەو ئەرکانە بەکاردێن کە هێزە ئاساییەکان ناتوانن ئەنجامی بدەن.

ترەمپ: مادۆرۆ و ژنەکەیمان دەستگیر کردووە