نرخی نەوت رووی لەدابەزین کردەوە

شۆڕش قادری

دوای ئەوەی لە چەند رۆژی رابردوودا نرخی نەوت بەرزبوونەوەی بەخۆیەوە بینی، ئەمڕۆ دیسانەوە رووی لە دابەزین کردەوە و هەر بەرمیلێک لەسەروو 62 دۆلارەوە مامەڵەی پێوەدەکرێت.

ئەمڕۆ پێنجشەممە 25.12.2025 و لەکاتی کردنەوەی بازاڕی جیهانی نەوت، نرخی هەر بەرمیلێک نەوتی خاوی برێنت بە 62 دۆلار و 24 سەنت دیاری کراوە و بەراورد بە دوێنێ ئێوارە نرخەکەی بەڕێژەی 0.22٪ دابەزیوە.

هاوکات هەر بەرمیلێک نەوتی خاوی تێكساس بە 58 دۆلار و 35 سەنت مامەڵەی پێوەدەکرێت و ئەویش نرخەکەی بەڕێژەی 0.05٪ دابەزیوە.

سەرچاوەکانی بازاڕی جیهانی، بە پشتبەستن بە زانیارییەکانی دامەزراوەی نەوتی ئەمریکی (API) کە رۆژی سێشەممە بڵاوکراونەتەوە، رایانگەیاندووە، هەفتەی رابردوو ئەمباركردنی نەوتی خاو و بەنزینی ئەمریکا بەرزبووەتەوە، سەرچاوەکان کە ناویان ئاشکرا نەکردووە، رایانگەیاندووە نەوتی خاو دوو ملیۆن و 390 هەزار بەرمیل بەرزبووەتەوە.