پۆلیسى هەولێر وردەکاریی گیانلەدەستدانی دوو کارمەندەکەى سیکیورتى ئاشکرا دەکات

وریا فەتاح

پۆلیسی هەولێر وردەکاریی رووداوەکەی شەوی 4ـی کانونی یەکەمی سەر شەقامی 40 مەتریی شارەکەی ئاشکرا کرد، کە تێیدا ئۆتۆمبێلێک خۆی کێشا بە دوو پاسەوانی بەردەم شوقەکانی “بولیڤارد” و دەستبەجێ گیانیان لەدەستدا.

بە گوێرەی راگەیەندراوەکەی پۆلیس، رووداوەکە بەم شێوەیە بووە:

ئەو ئۆتۆمبێلەی خۆی کێشاوە بە پاسەوانەکاندا، جۆری (تۆیۆتا – پیکاب دەبڵ بە ژمارە 5427) بووە و و سەر بە وەزارەتی پێشمەرگەیە، شۆفێرەکەی بەناوی (م. ئە. م) لە کاتی رووداوەکەدا ماددەی کحولی بەکارهێناوە و سەرخۆش بووە.

ئۆتۆمبێلێکی جۆری مارسیدس لە بەردەم دەرگای شوقەکان وەستاوە و شۆفێرەکەی (هەژان هیوا) خەریکی قسەکردن بووە لەگەڵ دوو کارمەندی سکیوریتی بۆ ئەوەی ڕێگەی پێ بدەن بچێتە ژوورەوە، لەو کاتەدا ئۆتۆمبێلە پێکابەکە خۆی کێشاوە بە مارسیدسەکە و دوو پاسەوانەکەدا.

بەهۆی ڕووداوەکەوە هەردوو پاسەوانەکە بە ناوەکانی (محەمەد سەردار موحسین) و (ئەحمەد محەمەد شەریف) گیانیان لەدەستداوە.

کێ خەتابارە؟
بەپێی هێڵکاریی هاتووچۆی هەولێر، شۆفێری پێکابەکە 100% کەمتەرخەم و خەتابار بووە، ئێستا بە بڕیاری دادوەر و بەپێی ماددەی 24ی هاتووچۆ راگیراوە.