پێنجەمین زانکۆی حکومی و شەشەمین زانکۆیە لە هەرێمی کوردستان

زانکۆی کۆیە بۆ یەکەمین جار لە ریزبەندی QS 2026 تۆمارکرا

964+

ژێوار خدر

زانکۆی کۆیە بۆ یەکەمین جار توانی ناوی خۆی لە ریزبەندی زانکۆکانی هەرێمی عەرەبی QS بۆ ساڵی 2026 دا تۆمار بکات، کە یەکێکە لە گرنگترین و ناسراوترین ریزبەندییەکانی خوێندنی باڵا لە ئاستی نێودەوڵەتیدا.

زانکۆی کۆیە رایگەیاند، بەپێی ئەنجامە فەرمییەکانی ریزبەندیی QS، زانکۆی کۆیە پلەی شەشەمی لە نێوان سەرجەم زانکۆ حکومی و تایبەتەکانی هەرێمی کوردستان بەدەستهێناوە.

دەشڵێت، لەسەر ئاستی زانکۆ حکومییەکاندا پلەی پێنجەم و لەسەر ئاستی عێراقیش پلەی 16ـی گرتووە، لەسەر ئاستی وڵاتانی عەرەبیشدا، زانکۆی کۆیە لە ریزبەندی 151 -160 دێت.