کورد چاوەڕێی دانوستانی نوێ بوون بەڵام رێگەیان لێداخرا

ژووری هەواڵ

بەرەبەیانی ئەمڕۆ جارێکیتر یەکێک لە رێگا سەرەکيیەکانی نێوانی شارەکانی ئيدارەی خۆسەری دیموکراتیک لە رۆژئاوای کوردستان (باکووری سوریا) و ناوچەکانی ژێر دەسەڵاتی حکومەتی دیمەشق لەلایەن ئاسایشی گشتییەوە داخرا.

لەم بارەیەوە نوێنەری خۆسەری دیموکراتیک لە هەرێمی کوردستان بە 964ی وت، “ئەوەی ئەنجام دەدرێت وەک فشارێک لە بەرامبەر ئێمە دەکرێت و ناڕەوایە، ناتوانن بەردەوامی بەمە بدەن و ئەمە رێگایەکی سەرەکی و بازرگانییە و پەیوەندە بە ژیانی رۆژانەی خەڵکەوە”.

فەتحوڵا حوسەینی باس لەوەش دەکات، “ئەحمەد شەرع دەیەوێت ببێتە پاڵەوانی پارچەکردنی سوریا و هێزە دەرەکییەکان بەڕێوەی دەبەن، ئەمەش لای ئێمە جێگای قبوڵ نییە، چونکە ئێمە خاوەن هێز و سیستم و پێگەی خۆمانین”.

ئەمە لە کاتێکدایە لە  27ی ئەیلولی ئەمساڵ رێگای  دێر حەفر-حەلەب بە رووی رۆژئاوادا داخرا، تاکە رێگایەک کە بە دەستی کوردەکانەوە مابوو بۆ گەشتن بە شارەکانی تری سوریا، رێگای سەلەمیە – تەبقا بەکاردەهێنرا، ئەمڕۆش رێگاكە بە رووی دانیشتووانی ناوچەکەدا داخرا؛ ئەمەش هاوکاتە لەگەڵ بەڕێوەچوونی هەڵبژاردنەکانی پەرلەمان لە چەند ناوچەیەکی سوریا، جگە لە ناوچەکانی سەر بە خۆبەڕێوەبەری دیموکراتیک لە رۆژئاوا و سوەیدا.