لە کارگەیەکى شیش لە هەولێر
ئەو کرێکارەى دوێنێ قاچى لەدەستدا؛ ئەمڕۆ گیانى لەدەستدا
964+
عەبدولعەزیز خالند – هەولێر
ئەو کرێکارەى دوێنێ بەهۆى تەقینەوەیەک لەناو کارگەى شیشى لاجان لە هەولێر قاچێکى لەدەستدا و بەسەختى بریندار بوو، بەڵام ئەمڕۆ گیانى لەدەستدا.
سەرچاوەیەک لە نەخۆشخانەی میدیکانۆ بە 964ـى وت،” کاتژمێر 7ـى بەیانی ئەو کرێکارە گیانی لەدەستداو و تەرمەکەی رەوانەی پزیشکی دادی کراوە”.
وتیشى،”هۆکاری گیانلەدەستدانەکەی بەهۆی ئەو زەبرە بووە کە بەر سینگ و سەری کەوتووە”.
لاى خۆیەوە، ئارام نەجات، بەڕێوەبەرى پزیشکى دادى هەولێر بە 964ـى وت،”تەرمى ئەو گەنجەیان بۆ هاتووە و توێکاریان بۆى کردووە و رادەستى کەسوکارى کراوەتەوە”.
دوێنێ شەممە 27.9.2025 بەهۆی تەقینەوەیەک لەناو كارگەی شیشی لاجان لە هەولێر، كرێكارێك بەناوی یاسین هەردی هەركی، قاچی راستی لەدەست دا، دواتر گواسترایەوە بۆ نەخۆشخانە.
پێداچوونەوە: وریا فەتاح
