هەولێر
لە پارک و شوێنە گشتییەکان؛ 350 تەنەکەخۆڵى نوێى ریسایکلین دانران
964+
عەبدولعەزیز خالند – هەولێر
بە مەبەستی دووبارە بەکارهێنانەوەی پاشماوەکان، وەزارەتی شارەوانی و گەشتوگوزار بە هاوکاری کۆمپانیای کوردستان فاوندەیشن، 350 تەنەکە خۆڵی جیاوازی لە پارک و شوێنە شگتییەکان داناوە.
تەنەکە خۆڵە نوێیەکان دوو کونى هەیە، کونێکیان بۆ ئەو پاشماوانەیە کە ریسایکل دەکرێن و دووبارە دەتوانرێت بەکاربهێندرێنەوە، کونەکەى تر بۆ ئەو پاشماوانەیە کە ناتوانرێت سودیان لێ وەربگیردرێت.
ژیار جەلال، بەڕێوبەری خزمەتگوزاری و ژینگەپارێزی هەولێر بە 964ـى وت،” لە قۆناغی سەرتا 350 تەنەکە خۆڵ بۆ پارێزگای هەولێر دانراوە و 150 لە نێو پارکی سامی عەبدولرحمان و 85 لە پارکی پێشمەرگە و 115 لە شەقامی 60 مەتری و ناوبازاڕی هەولێر دانراون”.
وتیشی،”ئێمە لە قۆناغی سەرەتا تەنیا زبڵەکان کۆ دەکەینەوە و ئامادەکاری دەکەین بۆ ئەوەی ئامێرێکی گەورەی زبڵ بۆ کۆمەڵگای کانی قرژاڵە دابنێین بۆ ئەوەی دووبارە ریسایکلین بۆ پاشماوەکان بکەینەوە”.
پێداچوونەوە؛ وریا فەتاح
