نزیکەی 45 کەسی خەڵکی گوهەرزێ لەلایەن سوپای تورکیاوە دەستگیر کران

ژووری هەواڵ

نزیکەی 45 کەسی دانیشتوانی گوندی گوهەرزێ ویستوویانە سەردانی گوندە کۆنەکەی خۆیان بکەن، بەڵام لەلایەن سوپای تورکیاوە دەستگیر کراون، موختاری گوندەکەش دەڵێت، دوای دوو کاتژمێر ئازاد کراون .

ئەمڕۆ شەممە 23.8.2025، لە نزیک کاتژمێر 9:00 بەیانی ژمارەیەک لە دانیشتووانی گوندی گوهەرزی ویستوویانە سەردانی گوندە کۆنەکەی خۆیان بکەن و لەلایەن سوپای تورکیاوە دەستگیر کراون، چونکە ماوەی مانگێکە دەنگی تەقە و بۆردومان لە گوندەکانی سنووری قەزای ئامێدی نابیسترێت، رەوشی شاخ و باخەکان ئارامە و دانیشتووانی گوندەکان داوا دەکەن رێگە بکرێتەوە بۆ گوندە چۆڵکراوەکان و بڕۆنەوە سەر باخ و ماڵەکانی خۆیان.

ئەحمەد سەعدوڵا، موختاری گوندی گوهەرزی بە 964ـی وت، “دوای پرۆسەی ئاشتی و ئارامی ناوچەکەمان، لەگەڵ نزیکەی 45 گوندشینان ویستمان سەردانی گوندە کۆنەکەی خۆمان بکەین، بەڵام کاتێک گەیشتینە ناو گوندەکە، ژمارەیەک سەربازی تورک هاتن و ئێمەیان پێکەوە لە شوێنێکدا دەستگیر کرد، دوای دوو کاتژمێر و چەندین هەوڵ و پەیوەندی، کەمێک لەمەوبەر ئازاد کراوین و ئێستا بەرێگاوەین دەڕۆینەوە گوندەکەی خۆمان.

بە قسەی موختار، سەربازانی تورك پێیان وتوون ئەوە شوێنی لەشکری ئەوانە و نابێتە سەردانی لێرە بکەن، هەر کاتێک ئەوان پێیان بڵێن وەرن سەردان بکەن، ئەو کات دەتوانن بێن.

گوندی گوهەرزێ دەکەوێتە ناحیەی دێرەلوک لەسنووری قەزای ئامێدی .

لە لایەكی دیكە، دوێنی رۆژی هەینی 2025.8.22، بە شێوەیەکی فەرمی لە کاتژمێر 6:00ی بەیانی تا 5:00ی ئێوارە رێگای 15 گوندی دەڤەری بەرگارەی کرایەوە، سەرچاوەیەکی فەرمییش بە 964ـی وت، ماوە ماوە رێگەی گوندەکانی دەڤەری بەرگارەی دەکرێتەوە و داوا لە دانیشتوانی گوندەکانی دەڤەری بەرگارەی دەکەین ئاگاداری خۆیان بن و نزیک شوێنە مەترسیدارەکان نەبنەوە، بۆ ئەوەی گیانی پارێزراو بێت و لە کاتژمێر 5:00ی ئێوارەی ئەمڕۆ بگەڕێنەوە.

پێداچوونەوە: ئەرسەلان عەبدوڵا