چەندین شەقامی تریش نۆژەندەكرێنەوە
سبەینێ بۆ خۆتان بە شەقامی بازنەیی مەلیك مەحمودا هاتوچۆ بكەن
964+
محەمەد فاتیح
تیمەکانی سەرۆکایەتیی شارەوانیی سلێمانی، بەردەوامن لە نۆژەنکردنەوەی شەقامەکان و قیرتاو کردنی شەقامی بازنەیی مەلیک مەحمود نزیک نەخۆشخانەی بەخشین لە تەواو بوندایە.
هەڵمەتی نۆژەنكردنەوەی شەقامەكانی سلێمانی، لەسەر داهاتی شارەوانی و بەپێی پڕۆگرامێكی ئامادەكراو بەردەوام دەبێت.
زەردەشت رەفیق، وتەبێژی شارەوانی سلێمانی، بە 964ـی وت، “قیرتاوكردنی شەقامی بازنەیی مەلیك مەحمود، سبەینێ كارەكانی تەواو دەبێت و لە كۆتایی ساڵ، لە دوای تەواوبونی هەموو كارەكان، تێچوی پڕۆژەكان و ژمارەكانیان رادەگەیەنین”.
پێشتر سەرۆکایەتیی شارەوانیی سلێمانی، سەرجەم شۆفێران و هاوڵاتییانی ئاگادار كردەوە، كه رۆژی دووشەممە رێکەوتی 4.8.2025 دەستدەکرێت بە کاری قیرکردن، لە شەقامە سەرەکییەکەى ژێرپردی بەکری حاجی سەفەر، نزیک نەخۆشخانەی بەخشین و داواى لە شۆفێران كرد، کە شەقامی جێگرەوە بەکار بهێنن و هاوکاری تیمەکانی شارەوانی و هاتووچۆ بکەن.
ئامار و داتای هەندێك لە کارەکانی سەرۆکایەتیی شارەوانیی سلێمانی لە 7 مانگی ئەمساڵدا:
قیرتاوكردن: 338,831 مەتر دووجا
تێكەڵە رێژكردن: 180,238 مەتر دووجا
كۆنكرێتكردن: 82,310 مەتر دووجا
روواندنی نەمام و گوڵ و پەرژین لە پاركی هەواری شار: 3391
كۆی گشتی رواندنی داروو دەوەن لە پاركی هەواری شار: 1533
چاندنی گوڵی جۆراوجۆر لە باخچەكانی سلێمانی: 18,552
چاندنی نەمامی جۆراوجۆر لە باخچەكانی سلێمانی: 3,634
شارەوانی سلێمانی لە ماوەی حەوت مانگدا نزیکەی 350 هەزار مەتر دووجا قیری کردووە
