هەر لەو جیهازەى مریشکەکانى پێ پاک دەکات، پێڵاوەکانیشى پێ دەشوات

وریا فەتاح

هۆبەى ئابورى یاریدەدەرێتی ئاسایشی راپەڕین، سەردانێکى مەیدانیان بۆ ناو حاجیاوا دەستپێکردووە، لەو کاتەدا سەردانى دوکانێکى مریشکفرۆشیان کردووە و دواى پشکنین بۆیان دەرکەوتووە کە فرۆشیار جوتێک لە پێڵاوەکانى خۆى هەر لەو جیهازەدا پاکدەکاتەوە کە مریشکەکانى پێ پاککردووە.

وەک ئەوەى هۆبەکە بڵاوى کردووەتەوە، ئەم دیاردەیە نەشیاوە و دورە لە رێنماییە تەندروستییەکان، ئەوە جگە لەوەى فرۆشیار نینۆکى هەبووە و سەدریە و کڵاوى بەکارنەهێناوە و پێشتریش چەند جارێک ئاگادارکراوەتەوە کە پابەندى رێنماییەکان بێت.

ئەمڕۆ لیژنەکە دواى تۆمارکردنى ئەم دیمەنانە، بڕیاریانداوە بە داخستنى شوێنەکە و پێبژاردنى، هەروەها بەڵێننامەى پێ پڕکراوەتەوە ئەگەر دووبارەى بکاتەوە دەدرێت بە دادگا.