لەکاتی خۆپیشاندانەکەی وەرتێ، بەرگری شارستانی سۆران لە ئامادەباشیدا بوو - وێنە؛ بەڕێوەبەرایەتی بەرگری شارستانی سۆران
"تا بەیانی حزورمان هەبوو"
لەکاتی خۆپیشاندانەکەدا بەرگری شارستانی سۆران لە ئامادەباشیدا بوو
شۆڕش قادری
لەکاتی خۆپیشاندانەکەی دوێنێ شەوی وەرتێ، تیمەکانی بەرگری شارستانی سۆران لە ئامادەباشیدا بوون و تا بەرەبەیان لەو شوێنە ماونەتەوە.
کاروان میراودەلی بەڕێوەبەری بەرگری شارستانی سۆران بە 964ـی وت، دوێنێ شەو چوار تیم لە بنکەکانی سیمیلان، سۆران، خانەقا و تیمی بەڕێوەبەرایەتی وەک فەرمانگەیەکی خزمەتگوزاری بەرگری شارستانی لە بنکەی خانەقای سنوری ناحیەی وەرتێ ئامادەبوون، بەمەبەستی پاراستنی سەلامەتی ماڵ و سامانی خەڵکی و رێگریگرتن لە رووداوەکانی ئاگرکەوتنەوە.
“خۆیشم کە شوێنەکە حزورم هەبوو و تا بەرەبەیان ماینەوە”، کاروان میراودەلی وای وت.
ئاماژەی بەوەشکرد، هیچ جۆرە رووداوێکی نەخوازراو و پەیوەندیدار بە بەرگری شارستانی رووی نەداوە و بەیانی ئەمڕۆ گەڕاونەتەوە بنکەکانی خۆیان.
شەوی رابردوو دانیشتوانى ناحیەی وەرتێ لە ئیدارەی سەربەخۆی سۆران، دژی کەمی کارەبا خۆپیشاندانیان کرد، دواتر خۆپیشاندانەکە گرژی و ئاڵۆزیی لێکەوتەوە و هاوڵاتییەک لەلایەن هێزە ئەمنییەکانەوە بە گولـلە، گیانى بەخشى.