لە سەرەتای ساڵیشەوە 400 هەزار گەشتیار سەردانیان کردووە
ئیدارەی سۆران چاوەڕێی هاتنی زیاتر لە 100 هەزار گەشتیارە بۆ رۆژانی جەژن
964+
ئاکام غەفور – سۆران
گەشتوگوزار و شوێنە گەشتیاریەکانی سنووری سۆران کەوتوونەتە خۆیان و ئامادەکاری دەکەن بۆ رۆژانی جەژن و چاوەڕێی هاتنی زیاتر لە 100 هەزار گەشتیارن بۆ ناوچەکە.
گەشتوگوزاری ئیدارەی سۆران هەفتەیەکە سەردانی شوێنە گەشتیاریەکان دەکەن، بۆ رێنمایی کردن و ئامادەکاری بۆ جەژن، هەموو شتێ ئامادەیە تەنها گەشتیار ماوە بێت.
فەیسەل سادق، بەڕێوەبەری گشتی گەشتوگوزاری سۆران، باسی ئامادەکاریەکان بۆ 964 دەکات و دەڵێت، لیژنەیەکی تایبتەمان هەیە سەردانی شوێنە گەشتیاریەکان دەکەت بۆ ئەوەی کەم و کوڕی نەبێت لە رۆژانی جەژن و لەگەڵ پۆلیسی هاتوچۆ و بەرگری شارستانی هەماهەنگیمان کردووە بۆ ئەوەی گەشتیاران بە سەلامەت گەشتی خۆیان بکەن و جەنجاڵی دروست نەبێت.
دەشڵێت، بەهۆی گونجاوی ناوچەکە و کەمی پلەکانی گەرما و دروست کردنی چەند پرۆژیەکی نوێی گەشتیاری، چاوەڕێ دەکەین ژمارەی هاتنی گەشتیاران بەراورد بە ساڵانی رابردوو زیاتر بێت، بۆ جەژنیش پێشبینی هاتنی زیاتر لە 100 هەزار گەشتیار دەکەین.
هەڵکەوتەی جوگرافی و سروشتەکەی ئیدارەی سۆران وایکردوە لە چوار وەرزەی ساڵ گەشتیار روو لە ناوچەکە بکات و لە سەرەتای ئەمساڵیش تاکو ئێستا نزیکەی 400 هەزار گەشتیار سەردانی ناوچەکەیان کردووە.
پێداچوونەوە: توانا نەقی
