نالییەک لە تاراوگەوە؛ چرۆی هیوایەک لە قەڵادزێ دەڕوێنێت

964+

وریا فەتاح

لە تاڕاوگەوە گەنجێکی پشدەری، کە هێشتا شنەی بیست بەهاری تەمەنی بەرنەکەوتووە، وەک چۆن “نالی” شاعیر حەسرەتی خاکی نیشتمانی دەکێشا، “نالی پشدەر”یش بە هەمان ئەو عیشقەوە، سنوورەکان دەبڕێت و دەگەڕێتەوە بۆ باوەشی کوردستان. ئەمجارەیان، نە بە قەڵەم و نە بە شیعری حەسرەت، بەڵکو بە بازووی پۆڵایین و نییەتێکی ئاوەدانی، دەیەوێت برینێک ساڕێژ بکات و یادێک زیندوو رابگرێت.

ناڵی، ئەو لاوەی کە چاوەڕوانی وەرگیرانیەتی لە زانکۆکانی ئەڵمانیا، پشووەکەی نەکردووەتە دەرفەتی گەشت و گوزار، بەڵکو کردوویەتییە دەرفەتێک بۆ خزمەت. لەسەر شەقامی شەست مەتری قەڵادزێ، لەسەر رووبەری نیو دۆنم زەوی، خەریکى دروستکردنى باخچەیەکە و تێچووەکەى گرتووەتە ئەستۆ.

“دەمەوێت باخچەکە شتێکى بێ کەموکوڕى بێت،” ناڵی وا دەڵێت، وەک ئەوەی بیەوێت بەم کارەی، وێنەیەکی جوانی گەنجی کورد نیشان بدات کە لە هەر کوێیەکی دنیا بێت، دڵ و هزری لای زێدی خۆیەتی. باخچەکە بە شێوازێکی ئەندازەیی و مۆدێرن دروست دەکرێت، تێیدا سنەوبەر، ئەو درەختەی بووەتە رەمزی قەڵادزێ  و رەنگێکى چوار وەرزە سەوز و سێبەری فێنکی هەیە، بەشى سەرەکى باخچەکە پێکبهێنن.

وەک نالى باسى دەکات، تائێستا ناوێکى بۆ باخچەکە نەدۆزیوەتەوە، بەڵام بیردەکاتەوە و دەیەوێت ناوێکى فۆلکلۆرى و کۆنى لێبنێت کە گوزارشت بێت لە مێژوو و رەسەنایەتى زێدى باوکى.

بڕیارە ئەم باخچەیە لە 26ـی حوزەیران، لە ساڵیادی راگواستنی قەڵادزێدا، بکرێتەوە. ئەو رۆژە تاڵەی کە ساڵی 1989، رژێمی بەعس خەڵکی شارەکەی ئاوارە کرد و شارەکەی خاپوور کرد. ئێستا، ناڵی دەیەوێت بەم کارەی، پەیامێک بدات: راگواستن کۆتایی نەبوو، بەڵکو سەرەتایەک بوو بۆ بەردەوامی و ئاوەدانکردنەوە. باخچەکەی ناڵی، دەبێتە بەشێک لە زیندووکردنەوەی قەڵادزێ و شاهیدێک لەسەر خۆڕاگری و خۆشەویستیی نەوەی نوێ بۆ خاکەکەیان.

نالى کە جل و بەرگى کوردى لەبەرکردووە لەم وێنەیە لە نێوان قائیمقام و سەرۆکى شارەوانى قەڵادزێ دەرکەوتووە