دەنگە بەرزەکەی ناحیەی گەڵاڵە تەقاندنەوەی شەش هەزار مین بوو

ژووری هەواڵ

ئەمڕۆ لە سنووری ناحیەی گەڵاڵەی قەزای چۆمان دەنگێکی بەرز بیستراوە، دەزگای مینیش دەڵێت، ئەو دەنگە ئەوان بوون و پاشماوەی جەنگییان تەقاندووەتەوە.

ئەمڕۆ یەکشەممە 18.5.2025، بەڕێوەبەرایەتی گشتی کاروباری مین لە هەولێر رایگەیاند، زیاتر لە شەش هەزار مین و پاشماوەی تەقەمەنی جەنگیان بردووەتە چیای بەردەبووک لە ناحیەی گەڵاڵە و لەوێ بەشێوازێکی کۆنترۆڵکراو لەناویانبردووە.

جەبار مستەفا، بەڕێوەبەری دەزگای مین بە 964ـی راگەیاند، تەقەمەنی و مینەکان شەش هەزار و 430 دانە بوون و هەموویان لە پێنج مانگی سەرەتای ئەمساڵ لە سنووری قەزای چۆمان دۆزراونەتەوە.

سێ رۆژ بەر لە ئێستاش، لە کێڵگەمینی مەحمودخان لە گوندی قڕگەی سەربە شارەدێی تانجەرۆ، ژمارەیەک مین و پاشماوەی جەنگی لەنێوبران.