دوکەڵی کارگەکە. فۆتۆ: پۆلیسی دارستان و ژینگەی سلێمانی
ژینگەی پیسکردووە
کارگەیەک لەسەر دوکەڵکردن لە عەربەت دەدرێت بە دادگا
964+
ژووری هەواڵ
لە ناحیەى عەربەت کارگەیەک بەهۆی دووکەڵکردن و پیسکردنی ژینگەی ناوچەکە درا بە دادگا.
ئەمڕۆ دووشەممە 12.5.2025، هێمن کەمەرخان، وتەبێژی پۆلیسی دارستان و ژینگەی سلێمانی بە 964ـی راگەیاند، لەسەر پیسکردنی ژینگە و بڵاوکردنەوەی دووکەڵ و بۆنی ناخۆش کارگەیەک لەلایەن بنکەى پۆلیسى دارستان و ژینگەى عەربەت رووبەڕووى دادگا کرایەوە.
“لە ئێستادا پەڕاوی لێکۆڵینەوە بۆ ئەو کارگەیە رێکخراوە بۆ وەرگرتنی رێکاری یاسایی و کێشەکە لەژێر لێکۆڵینەوەدایە”، پۆلیسی دارستان و ژینگەی سلێمانی لە پۆستێکی فەیسبوکدا وا دەڵێت.
هیوا عارف، دانیشتوویەکی ناحیەی عەربەتە کۆمێنتێکی بۆ پۆستەکەی پۆلیسی ژینگە کردووە و دەڵێت، بۆنی کارگەکە هەموو دانیشتوانی عە ربەتی بێزار کردووە، پاشماوە ی کارگەکەش درەنگانی شەو بە گەڵابە دەیهێنن و لە نزیک شوێنی نیشتەجێبوونی هاوڵاتیان فرێیدەدەن.
