لیژنەی لێكۆڵینەوەی رووداوەكانی یاریگەی نەورۆز قسەیان نەكرد

دیلان محەمەد جەزا

لیژنەکەی وەزارەتی ناوخۆ، دوای سەردانیكردنی یاریگەی نەورۆز، بێ هیچ لێدوانێک یاریگەكەیان جێهێشت.

ئەو لیژنەیەی بۆ لێكۆڵێنەوە لە رووداوەكانی یاریی نەورۆز و زاخۆ لە لایەن وەزارەتی ناوخۆی كوردستانەوە پێكهێنراوە، سەردانی یاریگەی نەورۆزیان كرد و بەبێ هیچ لێدوان و زانیارییەك یاریگەكەیان جێهێشت.

لیژنەكە دوای رووداوەكانی شەوی رابردووی یاریی نێوان نەورۆز و زاخۆ لە خولی ئەستێرەكان دروست كرا، كە لێكۆڵینەوە لە هۆكاری رووداوەكان و شەڕ و ئاژاوەی نێوان هاندەران دەكەن.

چاوەڕێ دەكرێت لیژنەكە لە رێگەی راگەیاندراوێك، یان كۆنگرەیەكی رۆژنامەوانی ئەنجامی لێكۆڵێنەوەكان رابگەیەنن.

هاوكات فیدراسیۆنی تۆپی پێی عێراقیش رایگەیاندووە، رێككاری توند بەرامبەر ئەوانە دەگرنەبەر، كە هۆكاری شەڕ و ئاژاوە بوون.

شەوی رابردوو لە كاتی بەڕێوەچونی یاریی نێوان هەردوو یانەی نەورۆز و زاخۆ لە یاریگەی نەورۆز لە خولی ئەستێرەكانی عێراق، گرژی و ئاڵۆزی لە نێوان هاندەرانی هەردوولا دروست بوو، بە هۆیەوە 62 هاوڵاتی بریندار بوون.

پێداچوونەوە: ئەرسەلان عەبدوڵا