هەر رۆژێک راوچییەکى ماسى دەستگیر دەکرێت

وریا فەتاح

لەوکاتەوەى قەدەغەى راوەماسى خراوەتە بوارى جێبەجێکردنەوە، هەر رۆژێک لە سنوورى بەڕێوەبەرایەتى پۆلیسى دارستان و ژینگەى سلێمانى بە نزیکەیى راوچییەک دەستگیر دەکرێت

20.3.2025، قەدەغەى راوەماسى لە هەرێمى کوردستان خرایە بوارى جێبەجێکردنەوە، تا 20.6.2025، بەردەوام دەبێت

پۆلیسى دارستان و ژینگەى سلێمانى بڵاوى کردەوە، لەئەنجامی دەرچوونی مەفرەزەیەکی بەشی پۆلیسی دارستان و ژینگەی سەیدسادق بۆ سەر دەریاچەی دەربەندیخان لە سنوری گوندی (بیەڕەشکە) توانرا دوو سەرپێچیکار لەکاتی راوکردنی ماسی دا دەستگیر بکەن .

ئەمڕۆ 30 رۆژ بەسەر قەدەغەى راوەماسی تێپەڕ دەبێت، لەو ماوەیەدا، بەپێى ئەو بڵاوکراوانەى بەڕێوەبەرایەتى پۆلیسى دارستان و ژینگەى سلێمانى خستوونییەتەڕوو، لەو ماوەیەدا 25 راوچى لە سنوورى بەڕێوەبەرایەتییەکە دەستگیرکراون و ژمارەیەکى زۆر تۆڕى ماسیش کە خاوەنەکانیان نادیارن، هەڵگیراونەتەوە و بەسەدان ماسى زیندوو خراونەتەوە ناو ئاو.

سنوورى بەڕێوەبەرایەتى پۆلیسى دارستان و ژینگەى سلێمانى، سنوورى هەریەک لە قەزاکانى، چەمچەماڵ، دوکان، دەربەندیخان، سەیدسادق، پێنجوێن، ماوەت، شارباژێر دەگرێتەوە کە هەردوو دەریاچەى دوکان و دەربەندیخانى بەسەرەوەیە.