دارى کێوى لە دوورگەى نێوان شەقامەکان دەچێنن

کامیار کەمال- پێنجوێن

ژینگەدۆستانى پێنجوێن، ئەزمونێکى نوێ تاقى دەکەنەوە و دارى کێوى لە دوورگەی نێوان شەقامەکانی شار دەچێنن.

غەریب مستەفا، سەرۆکی گروپی درەخت لە پێنجوێن بە 964ـى وت،” رووخسەتیان لە لایەنی پەیوەندیدار خواستووە بۆ هێنان و چاندنی دارى کێوى لە دوورگەى نێوان شەقامەکانى شار”.

دارەکان لە جۆرى مازو و بەڕوون، کە تایبەتن بە سروشتى کوردستان و لە شاخ و شوێنە سەختەکانى کوردستانیان سەوز کردووە و بەرگەى کەشوهەواى سارد و گەرم دەگرن.

وەک ئەوەى باسى دەکات، ئەو ژمارەدارەى چاندوویانن ئەزمونین، ئەگەر سەرکەوتووبن، لە داهاتوودا لە دەروازەى شار دەیچێنن.

“دەمانەوێت لەو رێگەیەوە دارە سروشتییەکان تێکەڵ بە شار و شەقامەکان بکەین، چونکە ئەو دارانە رەمزى سرووشى کوردستانن”، غەریب مستەفا واى وت.

گورپی درەخت، کە پێشتر لەژێر ناوی گروپی “نەمان” چالاکی دەکرد، گروپێکی ژینگەدۆستن لە پێنجوێن و ساڵانە بە هەزاران نەمان دەچێنن.

پێداچوونەوە: وریا فەتاح