ژمارەیەک پەنابەر. فۆتۆ: سۆشیاڵ میدیا
بە دوو قۆناغ
حکومەتی هەرێم پارە دەدات بە 45 کەس کە لە تاراوگە گەڕاونەتەوە
964+
ژووری هەواڵ
حکومەتی هەرێم لە رێگەی رێکخراوی نێودەوڵەتیی کۆچ و حکومەتی هۆڵەندا هاوکاری دارایی 45 هاونیشتمانی دەکات کە بڕیاریانداوە لە تاراوگە بگەڕێنەوە بۆ هەرێمی کوردستان.
ناوەندی هاوبەشی هەماهەنگی قەیرانەكان رایگەیاند، لەڕێگەی سیستەمی رەوانەکردنی نیشتیمانی، 45 گەڕاوەی نیشتیمان لە پارێزگاکانی هەولێر و سلێمانی هاوکاری کران، ئەوەش بە مەبەستی کارئاسانی و زووتێکەڵبوونەوەیان لەگەڵ کۆمەڵگە.
هاوکاریەکە لە رێگەی رێکخراوی نێودەوڵەتی بۆکۆچ iom و بە پشتیوانی حکومەتی هۆڵەندا، دابین کرابوو، هاوکاریەکە بریتی بوو لە پشتیوانی دارایی و بە دووقۆناغ پێشکەش دەکرێت.
“سیستەمی رەوانەکردنی نیشتیمانی ئێستا لە هەردوو پارێزگای هەولێر و سلێمانی کاردەکات و لە ئایندەیێکی نزیک لە تەواوی پارێزگا و ئیدارە سەربەخۆکانی تر دادەمەزرێت”، ناوەندی هاوبەشی هەماهەنگی قەیرانەكان وا دەڵێت.
خزمەتگوزارییەکە بۆ ئەو هاونیشتمانییانەیە کە لەدوای 2023 گەڕاونەتەوە یاخود دەگەڕێنەوە بۆ هەرێمی کوردستان چ بەشێوەی دیپۆرت یاخود ئارەزوومەندانە، بەڵام دەبێت سەردانی ناوەندو بەڕێوەبەرایەتیەکانی کۆچ و کۆچبەران و وەڵامدانەوەی قەیرانەکان بکەن لە پارێزگاو ئیدارە سەربەخۆکان بەمەبەستی تۆمارکردنیان لە سیستەمەکە.
