لە سبەینێوە تا سێشەممە سلێمانی بەردەوام کارەبای دەبێت

شۆڕش قادری

لە سبەینێوە تا رۆژی سێشەممە وەزارەتی کارەبا تاقیکردنەوە بۆ تۆڕی کارەبای نیشتمانی لە سنووری سلێمانی ئەنجام دەدات و چەند شوێنێک بەردەوام کارەبایان دەبێت، بەڵام جاربەجاریش ئەگەری پچڕانی هەیە.

وەزارەتی کارەبای حکومەتی هەرێم لە ئاگادارییەکدا دەڵێت، “لە سنووری پارێزگای سلێمانی و بە دیاریکراوی لە سەنتەری شاری سلێمانی هەڵدەستین بەئەنجامدانی تاقیکردنەوەی فشاری سەر تۆڕی کارەبای نیشتمانی لە سبەینێ شەممە 15.3.2025 کاتژمێر 10 تاقیکردنەوەکە دەستپێدەکات تا رۆژی سێشەممە 18.3.2025 بەردەوام دەبێت و لەم نێوەدا کارەبای نیشتیمانی بەردەوام کارا دەبێت، بەڵام پێدەچێت لە هەندێک شوێن، پچڕانی نەخوازراوی کارەبا رووبدات”.

روونیشیکردووەتەوە، ئەو تاقیکردنەوەیە رێکارێکی رۆتینییە بۆ تۆڕی کارەبا ئەنجام دەدرێت بە ئامانجی دۆزینەوە و دیاریکردنی کێشە و خاڵە لاوازەکانی سەر تۆڕەکانی گواستنەوە و دابەشکردنی کارەبا.

وەزارەتی کارەبا ئاماژەی بەوەشکردووە، تاقیکردنەوەکە هەموو گەڕەکەکانی ناوشار ناگرێتەوە و سنوردارە لە چەند شوێنێکی دەستنیشانکراو.