"بەردەوام دەبین لە کاری مەدەنی و ناڕەزایەتی"
سێ لە مانگرتووەکان تاجەگوڵینەیان لەسەر گۆڕی وریا حەمەکەریم دانا
964+
ئەمەل ناجی – ھەڵەبجە
سێ لە مانگرتووەکانی سلێمانی گەڕانەوە هەڵەبجە و تاجەگوڵینەیان لەسەر گۆڕی وریا حەمەکەریم رۆژنامەنووسی کۆچکردوو دانا.
ئەمڕۆ دووشەممە 17.2.2025 و لە مەراسیمێکدا، لە هەڵەبجە پێشوازیکرا لە هادی حەمەڕەشید و سروشت هاواری و عەتا ئەحمەد، سێ لەو مامۆستا و فەرمانبەرانەی کە لەبەردەم نوسینگەی رێکخراوی نەتەوە یەکگرتووەکان لە سلێمانی بۆ ماوەی 15 رۆژ مانیان لە خواردن گرت، دوای مەراسیمەکە چوونەسەر گۆڕی میدیاکاری کۆچکردوو وریا حەمەکەریم و تاجەگوڵینەیان دانا.
مامۆستا ھادی حەمەڕەشید بە 964ی وت، “ئەو خەباتەی ئێمە دەستمانپێکرد بەردەوامە، ئەگەرچی ئێستا مانگرتن ھەڵپەسێردراوە، بەڵام بەردەوام دەبین لە کاری مەدەنی و ناڕەزایەتی و رێگەی دیکە دەگرینەبەر ھەتا دەگەینە ئامانجەکەمان”.
سەبارەت بە دانانی تاجە گوڵینە لەسەر گۆڕی وریا حەمەکەریم، ھادی حەمەڕەشید وتی، مەرگی وریا کارەساتێکی گەورە و ناخۆشبوو، نەمانتوانی لە پرسەکەیدا بەشداربین، بۆیە پێمانخۆشبوو بە نوێنەرایەتی هاوڕێیانمان بێینە سەر گۆڕەکەی و تاجە گوڵینەی رێز و وەفا دابنێین، چونکە وریا یەکێک بوو لەو رۆژنامەنوسانەی بەردەوام داکۆکی لەو مافانە دەکرد، کە ئێمە خەباتی بۆ دەکەین”.
ھادی حەمەڕەشید و سروشت ھاواری خەڵکی ھەڵەبجەن و عەتا ئەحمەدیش خەڵکی سەیدسادقە کە دوێنی لەلایەن کەسوکاری و خەڵکی سەیدسادقەوە پێشوازی لێکرا.
پێداچوونەوە: شۆڕش قادری
