بەتۆمەتى بیرهەڵکەندن چوار کەس دەستگیرکران

وریا فەتاح

لە پێنجوێن چوار کەس لەسەر هەڵکەندنى بیرى نایاسایى دەستگیرکران، لەسەرەتاى ئەمساڵیشەوە لە سنوورى سلێمانى حەوت کەس لەسەر هەمان حاڵەت دەستگیرکراون.

پۆلیسى دارستان و ژینگەى سلێمانى بڵاوى کردەوە، بەشى پۆلیسى دارستانى پێنجوێن، لەسەر جادەى پێنجوێن بۆ باشماخ چوار هاووڵاتیان بە تۆمەتى بیرهەڵکەندن دەستگیرکرد.

وەک ئەوەى باسکراوە، جگە لە دەستگیرکردنى ئەو کەسانە دەستبەسەر ئامێرێکى بیرهەڵکەندن و 44 بۆرى و یەک ئۆتۆمبێلدا گیراوە.

لەسەرەتاى ئەمساڵەوە، لە سنوورى بەڕێوەبەرایەتى پۆلیسى دارستان و ژینگەى سلێمانى حەوت کەس لەسەر هەڵکەندنى بیرى نایاسایى دەستگیرکراون، لەو ژمارەیە پێنج کەسیان لە پێنجوێن بوون و ژمارەیەک ئامێرى بیرهەڵکەندنیش دەستیان بەسەرداگیراوە.