بەڵێنی چارەسەرکردنی کێشەکانیان پێدراوە

دوای هەفتەیەک هاوڵاتیانی بنگرد رێگای بنگرد بۆ دوکانیان کردەوە

964+

محەمەد عەلی – پشدەر

بەرپرسانی ناوچەکە لەگەڵ هاوڵاتیانی بنگرد کۆبوونەوە، بەڵێنی جێبەجێکردنی داواکاریەکانیان پێدراوە و هاوڵاتیانی ناحیەی بنگردیش رێگای سەرەکی دەربەند بۆ دوکانیان کردەوە بەرووی هاوڵاتیاندا.

شوانە ئیسماعیل نوێنەری خۆپیشاندانەکە بە 964ـی وت، هەفتەیەکە وەک فشارێکی مەدەنیانە رێگای سەرەکی بنگرد بۆ دوکانمان دەخستبوو، وەکو سنووری بنگرد و دەڤەری مەرگە بەگشتی چەند داواکاریەکمان هەبوو بەڵێنمان دابوو تابۆمان جێبەجێ نەکەن رێگاکە نەکەینەوە، ئەمڕۆ بەرپرسانی سنوورەکە هاتن و بەڵێنیان پێداین کە داواکاریەکانمان بۆجێبەجێ دەکەن، ئێمەش رێگاکەمان کردەوە.

نوێنەری خۆپیشاندانەکە وتیشی، داواکاریەکانی ئێمە ئەوە بوون کە کارەبای نیشتیمانیمان بۆ چاک بکرێت و رێگای دەربەند بۆ بنگرد نۆژەن بکرێتەوە، هەروەها لەرووی ئیدارییەوە ئێمە سەر بە قەزای رانیە بین و سەربە دوکان نەبین لەبەر ئەوەی بۆئێمە دوورە و گونجاونییە، بەڵێنی جێبەجێ کردنی داواکاریەکانیان پێداوین.

“ئێمە وەک دانیشتوانی بنگرد چاوەڕێ دەبین، بزانین داواکاریەکانمان جێبەجێ دەبن یان نا، هەرکات زانیمان جێبەجێ نابن، ئەوکات دێینەوە سەر شەقام و دووبارە فشار دروستدەکەین و رێگاکە دەگرینەوە، داواکارین لە لایەنی پەیوەندیدار ئەوبەڵێنانەی داویانە بیبەنە سەر و بەزویی بۆمان چارەسەر بکرێن”.شوانە ئیسماعیل وای وت.

ناحیەی بنگرد سەر بە قەزای دوکانە و نزیکەی 60 گوندی بەسەرەوەیە و لەو ژمارەیەش زیاتر لە 40 گوندی ئاوەدانە.

پێداچوونەوە: توانا نەقی

دانیشتووانی بنگرد هەفتەیەکە رێگایان داخستووە؛ خێمەیا...

دانیشتووانی بنگرد هەفتەیەکە رێگایان داخستووە؛ خێمەیان هەڵداوە و شەو و رۆژ چۆڵی ناکەن