ژمارەیەک بارهەڵگر لە مەرزی حاجی ئۆمەران - وێنە: ماڵپەڕی دەروازەی نێودەوڵەتی حاجی ئۆمەران
لە 10 مانگدا
نزیکەی 110 هەزار بارهەڵگر لە مەزری حاجی ئۆمەرانەوە هاتوچۆیان کردووە
964+
شۆڕش قادری
بەقسەی بەرپرسانی ئێران، لەماوەی 10 مانگدا، نزیکەی 110 هەزار بارهەڵگر و 900 هەزار گەشتیار لە مەرزی حاجی ئۆمەرانەوە هاتوچۆیان کردووە.
ئاژانسی هەواڵی ئیرنا لەزاری ئەرسەلان شوکری بەڕێوەبەری رێگاوبانی پارێزگای ورمێ بڵاویکردووەتەوە، “لە 21.3.2024ـەوە تا ئێستا، 109 هەزار و 862 تانکەر و بارهەڵگر لەڕێی دەروازەی نێودەوڵەتی حاجی ئۆمەرانەوە هاتوچۆیان کردووە و ئامارەکە بەروارد بە ساڵی پێشووتر لەو کاتەدا یەک هێندە و نیو زیادی کردووە”.
ئاماژەی بەوەشکردووە، هەر لەو ماوەیەدا 895 هەزار و 881 گەشتیار بە سێ هەزار و 828 پاس و حەوت هەزار و 244 ئۆتۆمبێلی تایبەت لە مەرزی حاجی ئۆمەرانەوە هاتوچۆیان کردووە.
دەروازەی نێودەوڵەتی حاجی ئۆمەران لە 25 کیلۆمەتری قەزای چۆمان و 11 کیلۆمەتری شاری پیرانشار لە رۆژهەڵاتی کوردستان هەڵکەوتووە و بە یەکێک لە دەروازە بازرگانییە سەرەکییەکانی نێوان هەرێمی کوردستان و ئێران لەقەڵەم دەدرێت.