به‌رله‌وه‌ى ده‌ست به‌ راوكردن بكه‌ن پۆلیس سێ كه‌سى ده‌ستگیركرد

فه‌رهاد حه‌سه‌ن

لە سنوورى قه‌زاى چەمچەماڵ سێ راوچى به‌ر له‌وه‌ى ده‌ست به‌ راوكردن بكه‌ن له‌لایه‌ن مه‌فره‌زه‌كانى پۆلیسی دارستان و ژینگه‌ دەستگیرکران.

ده‌ستگیركردنه‌كه‌یان له‌لایه‌ن مەفرەزەیەکى هاوبەشى بارەگاى بەشى پۆلیسى دارستانى چەمچەماڵ، بنکەكانى تەکیە و شۆڕش ئه‌نجامدراوه‌، ئه‌ویش دواى ئه‌وه‌ى دەرچوونێکى مەیدانیان بۆ کێوماڵكردنی سنوورەکە ئه‌نجامداوه‌.

لە سنوورى گوندى عه‌لى مه‌نسورى سه‌ر به‌ چه‌مچه‌ماڵ ئه‌م سێ راوچییه‌ دەستگیركراون .

به‌پێی ئه‌و دیمه‌نه‌ى بڵاوكراوه‌ته‌وه‌، چه‌ند سه‌گێك له‌ناو قه‌فه‌زى ته‌لبه‌ند ده‌ستیان به‌سه‌ر داگیراوه‌، پێده‌چێت ئه‌م كه‌سانه‌ ویستبێتیان راوى كه‌روێشك یان ئاژه‌ڵى بچووكی پێبكه‌ن.

بەڕێوەبەرایەتیی پۆلیسی دارستان و ژینگەی پارێزگای سلێمانی، ئه‌م زانیاریانه‌ى بڵاوكردووه‌ته‌وه‌ و ده‌شڵێت، پەڕاوى لێکۆڵینەوەیان بۆ ئه‌م سێ سه‌رپێچیكاره‌ كردووه‌ته‌وه‌ و رادەستى دادگایان كردوون بۆ وەرگرتنى رێکارى یاسایی .