ساغکردنەوە؛ یەک کیلۆ گۆشتی سوور نەبووەتە 25 هەزار دینار

964+

ئەحمەد مستەفا – سلێمانی

نرخی گۆشتی سوور لە بازاڕەکانی هەرێمی کوردستان بەرز نەبووەتەوە بەراورد بە چەند رۆژی رابردوو، بە سۆراغی تۆڕی 964، یەک کیلۆی لە نێوان 16 بۆ 18 هەزار دینارە.

ئەمە لەکاتێکدایە، لە ژمارەیەک تۆڕی کۆمەڵایەتی وا بڵاوکراوەتەوە کە یەک کیلۆ گۆشتی سوور بۆ 25 هەزار دینار بەرزبووبێتەوە.

تۆڕی 964 پرسیاری لە چەندین گۆشتفرۆش کرد لە شاری سلێمانی و هەولێر بۆ ساغکردنەوەی ئەو دەنگۆیانە.

هەر لەسەر ئەو بابەتە، شاڵاو عارف بەڕێوەبەری کوشتارگەی نوێی سلێمانی بۆ تۆڕی 964ی روونکردەوە، کە ئەگەری بەرزبوونەوەی گۆشت کراوەیە، چونکە نرخی ئالیک و ئەو پێداویستییانەی ئاژەڵی پێ بەخێودەکرێت گرانن لە چاو ساڵانی رابردوو.

هۆکارێکی دیکەی بۆ ئەگەری بەرزبوونەوەی گۆشتی سوور گەڕاندەوە بۆ کەمیی بەرهەمی ناوخۆ، وتی جاران سەدا 40ی پێداویستی ناوخۆی پڕدەکردەوە، ئێستا کەمترە، بۆیە ناچارن ئاژەڵ لە وڵاتانی دیکە بهێنن، ئەوەش مەسروفاتی زیاترە.

لە لایەکی دیکە، دەنگۆی گرانبوونی پیاز بڵاوکراوەتەوە، تۆڕی 964 سۆراغی کرد و بۆی دەرکەوت راستە، هەر کیلۆیەک نزیکەی 500 دیناری چووەتە سەر.

رۆژانی رابردوو، کیلۆیەک پیازی سپی سەرخڕ کە زۆرینەی خەڵکی بەکاری دەهێنن بە هەزار و 750 دینار بوو، ئێستا گەیشتووەتە دوو هەزار و 250 دینار، ئەمە جگە لەوەی جۆرەکانی دیکەی پیازیش کەمێک گران بوون.

ئێستا کە نرخی دۆلار لە بەرانبەر دیناری عێراقی بەرزە و بۆ هەر 100 دۆلارێک سەروو 170 هەزار دینارە، هاوڵاتیان نیگەرانن ئەو بارودۆخە کاربکاتە سەر نرخی خواردن و شتومەک و گرانتریان بکات.