رێڕەوی بارهەڵگرەکان لە قەرەهەنجیرەوە تا بازگەی کەرکوک کۆنکرێت دەکرێ

ئەحمەد مستەفا

لە کاتی سەردانەکەدا، رێبوار تەها وتی، قۆناغێکی نوێی پرۆژەکە دەستی پێکردووە، کە بریتییە لە کۆنکرێتکردنی رێڕەوی ئۆتۆمبێلە بارهەڵگرەکان و بلوارەکان، لە بازگەی کەرکوکەوە تا ناوچەی قەرەهەنجیر.

ئەمڕۆ شەممە 24.10.2026، رێبوار تەها، جێگری یەکەمی پارێزگاری کەرکوک، سەردانی پرۆژەی فراوانکردن و نوێکردنەوەی رێگای کەرکوک – چەمچەماڵی کرد.

بەپێی قسەکانی کە لە پێگەی فەڕمی خۆی بڵاوی کردووەتەوە، لە قۆناغەکانی داهاتوودا، بەشەکەی دیکەی پرۆژەکە لە قەرەهەنجیرەوە بەرەو چەمچەماڵ جێبەجێ دەکرێت.

پرۆژەی فراوانکردن و نوێکردنەوەی ئەم رێگایە لە چوارچێوەی هەوڵەکان بۆ باشترکردنی تۆڕی رێگاکان، ئاسانکردنی هاتوچۆ و کەمکردنەوەی کێشەکانی گواستنەوەی کەلوپەل و بار لە نێوان کەرکوک و چەمچەماڵدایە.

دیمەنی سەردانی جێگری یەکەمی پارێزگاری کەرکوک، رێبوار تەها.