ئەمڕۆ هەڵبژاردەی عێراق ئەركی ئاسان نییە

964+

ئەرسەلان عەبدوڵا

لە گەڕی شەشەمی پاڵاوتنەكانی ئاسیا بۆ گەیشتن بە مۆندیالی 2026، ئەمڕۆ ئێوارە هەڵبژاردەی عێراق رووبەڕووی هەڵبژاردەی عومان دەبێتەوە.

یارییەكە كاتژمێر 07:00 لە یاریگەی سوڵتان قابوس لە مەسقەت دەكرێت و لە ركابەرییەكانی كۆمەڵەی دووەمە.

خیسیۆس كاساسی ئیسپانی، راهێنەری هەڵبژاردەی عێراق لە كۆنگرەی رۆژنامەوانی دوێنێی پێش یارییەكە، دانی بەوەدانا یارییەكە بۆ عێراق قورسە و هەردوو تیپ یەكتر باش دەناسن، بە تایبەتی كە لە دوو ساڵی رابردوودا بە لای كەم سێ یارییان بەیەكەوە كردووە.

لەگەڵ ئەوەشدا ئاماژەی بەوەدا بۆ بردنەوە یاریی دەكەن و هەموو توانایان دەخەنەگەڕ.

لە كۆمەڵەی دووەمدا كۆریای باشوور بە 13 خاڵ لە پلەی یەكەمە، ئوردن و عێراق هەریەكەی 8 خاڵیان هەیە و ئوردن لە پلەی دووەمە بە جیاوازی گۆڵ و عێراق سێیەمە، هەڵبژاردەی عومانیش بە 6 خاڵ لە پلەی چوارەمە.

لە یاریی چووندا كە لە بەسڕە كرا، عێراق بە 1-0 گۆڵ لە عومانی بردەوە، بەڵام ئەمڕۆ لە ناو یاریگەی تیپی بەرامبەر یاریی دەكات.

شەقامی وەرزشی لە عێراق و میدیا و بەرپرسانی تۆپی پێی عێراقیش لە ئەنجامەكانی تیپەكە رازیی نین و ئەمڕۆ داوای بردنەوە دەكەن، بە تایبەتی دوای ئەوەی یاریی رابردوو نەیتوانی لە بەسڕە لە ئوردن بباتەوە.

عێراقییەكان چاوەڕێن تیپەكەیان راستەوخۆ بۆ مۆندیالی 2026 سەركەوێت و یەكێك لە دوو پلەی یەكەمی كۆمەڵەكە بەدەست بهێنێت.

عێراق دوای ئەو یارییەی ئەمڕۆ، چوار یاریی دیكەی لە پاڵاوتن دەمێنێت، كە دوو یارییان بەرامبەر كوێت و كۆریای باشوورە لە ناو یاریگەی خۆی، دوو یارییەكەی دیكەی بەرامبەر ئوردن و فەڵەستینە و هەردوو یاری لە ئوردن بەڕێوەدەچن.

ئامارەكانی نێوان هەردوو هەڵبژاردە

عێراق و عومان 30 یارییان بەیەكەوە كردووە، 14 بردنەوە بۆ عێراق و 6 بردنەوە بۆ عومان، 10 یارییش بە یەكسانی تەواو بووە.

یەكەم یاریی نێوانیان لە 1970 كراوە و گەورەترین بردنەوەی عێراق بەسەر عومان بە 7-0 گۆڵ بووە، گەورەترین بردنەوەی عومانیش بەسەر عێراق بە 4-0 گۆڵ بووە لە ساڵی 2009.

سێ یاریزانی كورد لە هەڵبژاردەی عێراق دوورخرانەوە و ئەمڕۆش کلاسیکۆ هەیە