“ خێرخوازێک دروستی كردووە “
قوتابخانەیەکی 18پۆلی لە بەحرکە دەکرێتەوە
+964
شۆڕش هەرکی- هەولێر
قوتابخانەیەکی 18 پۆلی لەسەر ئەرکی خێرخوازێک لە ناحیەی بەحركە دروستکراوە و کارەکانی بەرەو تەواوبوونە.
قوتابخانەی ئامادەیی ئەحمەد رێکانی لەسەر ئەرکی ئەحمەد رێکانی دروستکراوە و کچانی قوتابی سنوورەکە سوودی لێ وەردەگرن.
نیوار حوسێن، بەرپرسی بەشی پلان لە بەڕێوەبەرایەتیی پەروەردەی دەوروبەری هەولێر بە964ی وت، “ئەم قوتابخانەیە شوێنی 630 قوتابی یەک دەوامی لەخۆدەگرێت، بەڵام دەکرێتە دوو دەوامی و هەزار و 260 قوتابی تێیدا دەخوێنن، هەردوو قوتابخانەی ئامادەی بەحرکەی کچان و هەرمانی بنەڕەتی کچان دەگوازرێنەوە بۆ ئەم قوتابخانەیە”.
وتیشی، لە ناو ئەم قوتابخانەیەدا 30 ژوور بۆ کارگێران و مامۆستایان دروستکراوە، ئەمە جگە لەوەی شوێنی تاقیگەکانی فیزیا، کیمیا، زیندەزانی و کۆمپیۆتەر و کافتریا و گۆڕەپانی یاریگا و چەندین خزمەتگوزاری دیکەشی تێدا هەیە.
قوتابخانەكە لەسەر رووبەری 500 مەتر دووجا دروستکراوە، ئێستا لە سەنتەری ناحیەی بەحرکە 13 قوتابخانەی بنەڕەتی و سێ قوتابخانەی ئامادەیی هەنە و فەرمانی دروستکردن بۆ دوو قوتابخانەی دیکەش دەرچووە.
پێداچوونەوە: ئەرسەلان عەبدوڵا
19 قوتابخانەی نوێ بۆ خوێندنی ئەمساڵ دەكرێتەوە
