قیرتاوكردنی یەكێك لە شەقامەكانی پیرزین، فۆتۆ: پارێزگای هەولێر
پارێزگار لەوێ بوو
پیرزین ئاوڕی لێدرایەوە و پارك و پڕۆژەی دیكەی بۆ دەكرێت
964+
ئەرسەلان عەبدوڵا
لە كۆمەڵگەی پیرزینی نزیك هەولێر، ئاوەڕۆ و قیرتاوی شەقامەكانی دەكرێت، پارێزگاریش بەڵێنی بە دانیشتووانەكەی دا پاركێكیان بۆ دروست بكەن.
ئەمڕۆ پێنجشەممە 15.8.2024 پڕۆژەی دروستکردنی ئاوەڕۆ و قیرتاوکردنی 6000 مەتر دووجای شەقامەکانی کۆمەڵگەی پیرزین لە لایەن پارێزگاری هەولێرەوە بەسەر كرایەوە، كە بەپێی راگەیاندراوی پارێزگا لە قۆناغی کۆتایی و تەواوبووندایە.
تێچووی پڕۆژەکان، وەك راگەیاندراوە، 480 ملیۆن دینارە و لەسەر بودجەی پەرەپێدانی پارێزگای هەولێر جێبەجێ دەکرێت، کە پێشتر دوو ملیار و 800 ملیۆن دینار لە بودجەی پەرەپێدانی پارێزگا بۆ پیرزین تەرخان کرابوو.
ئاماژە بەوەش كراوە، لەسەر داواکاری خەڵک و هاوڵاتیانی كۆمەڵگەكە، پارێزگاری هەولێر ئومێد خۆشناو رەزامەندی بۆ دروستکردنی پارکێک لە پیرزین نیشان دا و بڕیاریشی دا دەستبەجێ دەست بەجێبەجێکردنی بکرێت.
