دیمەنێکی ئاگرەکە.... وێنەکان ؛ به‌رهه‌م ناسر
ده‌نگی ته‌قینه‌وه‌ى مینیش ده‌بیسترێت
ئاگرێكى گه‌وره له سنوورى ماوه‌ت كه‌وتووه‌ته‌وه
964+
فەرهاد حەسەن
ئەمشەو ئاگرێكی گه‌وره له سنوورى قه‌زاى ماوه‌ت كه‌وتووه و هۆكاره‌كه‌ى نه‌زاندراوه، هاوڵاتییه‌كیش ده‌ڵێت، ئاگره‌كه له پاشماوه‌ى ئاگرێكی دوێنێوه سه‌ریهه‌ڵداوه‌ته‌وه.
به‌رهه‌م ناسر، خه‌ڵكی قه‌زاى ماوه‌ته و نزیكه‌ى دوو كیلۆمه‌تر له شوێنى ئاگره‌كه‌وه دووره، به 964ـى وت، ئاگره‌كه سنوورى گونده‌كانى دڕی و قامیش و شاخى برزوو و دۆڵى شینكایه‌تى و بەرد بەردی گرتووه‌ته‌وه و تا دێت ئاگره‌كه فراوانتر ده‌بێت.
وتیشی “له‌گه‌ڵ ده‌سپێكردنى ئاگره‌كه چه‌ند جارێك ده‌نگى ته‌قینه‌وه‌ى مین و ته‌قه‌مه‌نى بیستراوه”.
ئه‌و شوێنه‌ى ئاگره‌كه‌ى لێكه‌وتووه‌ته‌وه، نزیكه له سنوورى نێوان هه‌رێمى كوردستان و ئێران و له ساڵانى هه‌شتاكانیش چه‌ندین ره‌به‌ى سه‌ربازى رژێمی پێشووى لێبووه و ئه‌و مین و ته‌قه‌مه‌نییه‌ى له‌ناو ئاگره‌كه ده‌ته‌قنه‌وه، بۆ ئه‌و كات ده‌گه‌ڕێنه‌وه.
رێبه‌ر حسێن، یه‌كێكى دیكه‌ى خه‌ڵكی ماوه‌ته به 964ـى وت، ئاگره‌كه دوێنێ له كاتژمێر نزیكه‌ى 2:30ـى دواى نیوه‌ڕۆ كه‌وتبووه‌وه، به‌ڵام ئێواره‌كه‌ى له‌لایه‌ن خه‌ڵكى گونده‌كان و تیمه ئه‌منییه‌كان كۆنتڕۆڵ كرا، ئه‌مڕۆكه‌ش ئه‌و ئاگره له‌و ئاگره‌ى دوێنێ دووباره كه‌وتووه‌ته‌وه.
وتیشی “له ئێستا به‌هۆى فراوانبوونى ئاگره‌كه‌وه چوار به‌شی گه‌وره‌ى له‌و سنووره گرتووه‌ته‌وه و تا دێت فراوانتر ده‌بێ”.
ئاماژه‌ى به‌وه‌شكرد، به‌هۆى سه‌ختى شوێنه‌كه‌و بوونى ته‌قه‌مه‌نی له شوێنى ئاگره‌كه تا ئێستا هیچ كه‌سێك بۆ كۆنتڕۆڵكردنى نه‌چوونه‌ته شوێنى ئاگركه‌وتنه‌وه‌كه”.
