هەزار و 800 نەخۆشی رانیە چارەسەر وەردەگرن

964+
ئەرسەلان عەبدوڵا

بەڕێوەبەری سەنتەری نەخۆشییەکانی مەمک لە راپەڕین دەڵێت، لە ماوەی نزیكەی دوو ساڵدا هەزار و 800 نەخۆش سەردانیان کردوون و چارەسەر و چاودێریی كراون.

کاروان محەممەد لە ڤیدیۆیەكی تایبەتدا بە فەرمانگەی میدیا و زانیاریی حكومەتی هەرێمی راگەیاندووە: لە 1.8.2022 تا ناوەڕاستی تەمموزی 2024، هەزار و 800 نەخۆش سەردانیان کردوون و چارەسەر و چاودێریی كراون، ئەمەش هەمووی بێبەرامبەر بووە.

ئاماژەی بەوەش داوە، “بەشێك لەو نەخۆشانەی روو لەو سەنتەرە دەکەن، ئەوانەن کە تووشبووی شێرپەنجەی مەمکن، یان بۆ دڵنیابوونەوە لە دۆخی تەندروستییان، پێویستییان بە بەدواداچوون و پشكنین هەیە”.

بەڕێوەبەری سەنتەرەكە دەڵێت، “هەموو ئەو ئامێرانەی پێویستن بۆ سەنتەرەکە دابینكراون، لەوانە سۆنار و مەمۆگرافیی پێشكەوتوو”.

“سەنتەرەکە ئاسانکاریی بۆ هەموو نەخۆشانی شێرپەنجەی دانیشتووی دەڤەری راپەڕین دەکات، کە لە سلێمانی و هەولێر لە ژێر چاودێریدان و رێگەی دوور و تێچوونی بەردەوامیان كەمدەكاتەوە”، کاروان محەممەد وای وتووە.

مانگی رابردوو لە سلێمانی یەک حاڵەتی شێرپەنجەی مەمک دیاری کراوە