باڵەخانەی یەکێتی خانەنشینان _ وێنە: 964
تەنیا دوو مەرج دانراوە
یەکشەممە خانەنشینانی زیندوو بچن بۆ فۆڕمی زەوی
964+
ئەحمەد مستەفا
وەزارەتی دارایی هەرێمی کوردستان دەڵێت، “ئەو خانەنشینانەی لە ژیاندا ماون رۆژی یەکشەممە داهاتوو، بچن فۆڕم وەربگرن و پڕی بکەنەوە تا ناویان بچێتە ناو لیستی دابەشکردنی زەوی”.
وەزارەتەکە دوو مەرجی سەرەکی بۆ خانەنشینان داناوە.
ئەمڕۆ چوارشەممە 24.7.2024، وەزارەتی دارایی و ئابووری حکومەتی هەرێمی کوردستان لە راگەیەندراوێکدا دەڵێت، “لە بەڕێوبەرایەتی گشتیی خانەنشینی وەزارەتی دارایی و ئابورییەوە ئاگاداری سەرجەم خانەنشینان دەکەینەوە کە لە رۆژی یەکشەممەی داهاتوو 28.4.2024 دەتوانن سەردانی بەڕێوبەرایەتی خانەنشینی پەیوەندیدار لە شار و شارۆچکەکان بکەن بەمەبەستی وەرگرتنی فۆڕمی دابەشکردنی زەوی”.
وەزارەتەکە دوو مەرجی سەرەکی داناوە، ” فۆڕمەکە تەنیا ئەو خانەنشینانە دەگرێتەوە کە لە ژیاندا ماون، هەروەها تەنیا ئەو خانەنشینانە دەتوانن فۆڕمی وەرگرتنی زەوی پڕبکەنەوە کە پێشتر بەهیچ جۆرێک سوودمەند نەبوون لە وەرگرتنی زەوی”.
