پڕۆژەی ئاوەڕۆی سندوقی سەرکەپکان گەیشتووەتە نیوە

ژێوار خدر

قۆناغی دووەمی پڕۆژەی ئاوەڕۆی سندوقی لە ناحیەی سەرکەپکانی ئیدارەی راپەڕین دەستیپێکرد، پڕۆژەکە بە سێ قۆناغ جێبەجی دەکرێت و بە تەواوبوونی گرفتی ئاوەڕۆی ناحیەکە بە تەواوی چارەسەر دەبێت.

ئەمڕۆ یەکشەممە مەولود حەمەد، سەرۆکی شارەوانیی سەرکەپکان بە 964ی وت، قۆناغی دووەمی پڕۆژەی ئاوەڕۆی سندوقی سەرکەپکان دەستیپێکرد و بڕیارە لە ماوەی دوو مانگدا تەواو بێت، پڕۆژەکە بە گوژمەی 139 ملیۆن دینار لەسەر بودجەی ئاسایی وەزارەتی شارەوانی و گەشتوگوزار و بەڕێوەبەرایەتیی شارەوانییەکانی راپەڕین جێبەجێ دەکرێت.

بە پێی وتەی سەرۆکی شارەوانی، ئاوەڕۆی سندوقی بە درێژای 245 م لە گەڕەکی شێبانی ناحیەکە جێبەجێ دەکرێت، لە سەرەتای گەڕەکەکەوە دەستپێدەکات و تا نزیکی ئاوەڕۆی گۆڕستانی گەورەی سەرکەپکان درێژ دەبێتەوە.

ئەو ئاوەڕۆیە سندوقییە، کۆکردنەوەی هەموو ئاو و زێرابەکانی ناحیەی سەرکەپکان لەخۆدەگرێت، تاوەکو ئێستا %90ی گەڕەکەکانی ئەو ناحییەیە کێشەی ئاوەڕۆیان بۆ جێبەجێکراوە و بە وتەی مەولود حەمەد، دوای تەواوبوونی پڕۆژەکە دەست دەکرێت بە جوانکاری و قیڕتاوکردن و کۆنکریت کردنی گەڕەکەکانی ناحیەی سەرکەپکان.

ناحیەی سەرکەپکان، یەکێکە لە چوار ناحیەی قەزای رانیە لە ئیدارەی راپەڕین، ناوەندەکەی شارۆچکەی  سەرکەپکانە، ژمارەی دانیشتووانی ناحیەکە لە ساڵی 2020دا هەشت هەزار و 957 کەس بووە.