لە کۆیە
ئەو پارکەى هەمووان روویان لێدەکرد ئێستا بووە بە کەلاوە
964+
گۆڤەند فەتاح – کۆیە
پارکى پشووى ئێواران، یەکێک بوو لە پارکە خۆشەکانى ساڵانى سەرەتاى دوو هەزارەکان لە کۆیە، بەڵام ئێستا بەهۆى نەبوونى خزمەتگوزارییەوە بووەتە کەلاوە و تەواوى پارکەکە وێران بووە، شارەوانیش دەڵێت،”بە نیازین نۆژەنى بکەینەوە”.
جاران پارکەکە پڕبوو لە یاریی جۆراوجۆرى و چەرخ و فەلەک، خەڵکێکى زۆرى کۆیە بەهۆى یارییەکان و جوانى و زۆرى رێژەی سەوزاییەوە لە پارکەکە ئێواران کاتەکانیان بەسەر دەبرد.
محەمەد میرحاج، سەرۆکی شارەوانیی کۆیە بە 964ـى وت، چەند جارێک هەوڵمان داوە و داوای بڕە بودجەیەکمان کردووە بۆ ئەوەی نۆژەنی بکەینەوە، ئەگەر تا وەرزی دارچاندن ئەنجامی نەبوو، ئەوکاتەوە وەک شارەوانی خۆمان ئەنجامی دەدەین و نۆژەنی دەکەینەوە.
پارکی پشووی ئێواران دەکەوێتە سەنتەری شاری کۆیە، رووبەرەکەی نزیکەی سێ هەزار مەتر سێجا دەبێت، بە هۆی نەبوونی خزمەتگوزاری بۆ پارکەکە، یارییەکان تێکشکاون و دارەکانی پارکەکە بەشێکی شکاون و سووتاون و بڕدراونەتەوە، جگە لە هەبوونی پاشـماوەی پیس و بوونی بۆنێکی ناخۆش.
پێداچوونەوە: وریا فەتاح
