چێشتخانەکان لە جەژندا کراوە نەبن سزا دەدرێن

پێشەوا محەمەد

ئەو چێشتخانانەی لە سلێمانی لە چەند زۆنێک دیاریکراون پێویستە لە رۆژانی جەژندا کراوە بن، ئەگەر وانەکەن کۆمەڵەی میوانخانە و چێشتخانەکانی سلێمانی سزایان دەدات.

دیاریکردنی چێشتخانەکان بەپێی شەقامی گشتی و شوێنە گەشتیارییەکانی سلێمانی دیاریکراون، ئەو چێشتخانانەی دەکەونە سەر شەقامە گشتییەکان، ئەوانەی دەکەونە شەقامی سالم و سەرچنار و چەند شوێنێکی دیکە دەبێت کراوە بن.

مەحمود تۆفیق، سەرۆکی کۆمەڵەی چێشتخانە و میوانخانەکانی سلێمانی بە 964ـی راگەیاند، ئەو گەشتیارانەی هاتوونە سلێمانی و دەوروبەری پێویستیان بە چێشتخانە و شوێنی نانخواردنە و پێویستە کراوە بن و لە پێشوازیی گەشتیاراندا بن.

وتیشی، “نزیکەی 15 شوێن هەیە شەو و رۆژ خواردنیان هەیە و کراوەن و شوێنەکانی دیکەش کە زیاتر لە 100 چێشتخانە دەبن دەبێت رۆژانە کراوەبن”.

بەپێی ئاماری گەشتوگوزاری سلێمانی لە چەند رۆژی رابردوودا زیاتر لە 60 هەزار گەشتیار هاتوونەتە سلێمانی و پێشبینیی هاتنی زیاتریش دەکرێت.

“ئێمە بەردەوام بەسەر چێشتخانەکاندا دەگەڕێین و ئەو شوێنانەی دەبێت کراوەبن و نەکرابنەوە سزا دەدرێن و سزاکەشیان تا نزیکەی 300 هەزار دینار دەبێت”، سەرۆکی کۆمەڵەی چێشخانە و میوانخانەکانی سلێمانی وای وت.