هەر رۆژێک نزیکەی پێنج حاڵەتی رەبۆ لە سلێمانی تۆمار دەکرێت

پێشەوا محەمەد

بەپێی ئامارێکی تەندروستیی سلێمانی، مانگی رابردوو 140 حاڵەتی رەبۆ لە سەنتەری حەساسییەت و رەبۆ تۆمارکراوە و پزیشکێکش دەڵێت، پیسبوونی هەوا و خۆڵبارین هۆکاری سەرەکییەتی.

ئاماری تەندروستیی سلێمانی ئاشکرای دەکات، لە مانگی پێنجدا 630 نەخۆش سەردانی سەنتەری حەساسییەت و رەبۆیان کردووە و 252ـیان لە رەگەزی نێر بوون و ئەوەی دیکەش لە رەگەزی مێ بوون.

فەرمان ئیبراهیم، پزیشکی سنگ و رەبۆ و تەنگەنەفەسی بۆ 964ـی روونکردەوە، پیسبوونی هەوا و خۆڵبارین لە هۆکارە سەرەکییەکانی تووشبوونن بە نەخۆشیی رەبۆ.

وتیشی، “رۆژبەرۆژ هەوا پیس دەبێت، خۆڵبارین زیاتر دەبێت و ژینگە بە هۆکاری راستەوخۆ و ناڕاستەوخۆ پیس دەبێت، ئەوانەش هەموو هاوکارن بۆ زیادبوونی نەخۆشیی رەبۆ بەتایبەت لە منداڵان و بەتەمەنەکاندا”.

“مانگی رابردوو 55 حاڵەتی نەخۆشیی لووت و هەوكردنی گیرفانەكانی لووت و 209 نەخۆشیی كۆئەندامی هەناسەدان، هەروەها 141 حاڵەتی هەوكردنی پێست و ئەكزیما و 120 حاڵەتی نەخۆشییەكانی پێست تۆمار كراون”، ئەوەش ئاماری تەندروستیی سلێمانییە.

نەخۆشیی رەبۆ یەكێكە لە نەخۆشییەكانی كۆئەندامی هەناسە و سییەكان كە تیایدا هەناسەدان ئەستەم دەبێت، لە هەندێك كاتدا دەبێت بە نەخۆشییەكی درێژخایەن.